Ai lad ka MBOSE ban leit shim lypa ia ki jingkylli ia ki skul ba jngai

Shillong, 12 Naiwieng:
Ka Meghalaya Board of School Education (MBOSE) ka la ailad ia kito ki skul kiba don jngai na ki jaka ba buh ia ki jingkylli ia ka eksamin klas IX ba kin phah da ka jingthoh sha ka MOBOSE lyngba u Director ba kin pan bor ban shim lypa ia ki jingkylli namar ka jingjngai.
Ia kane ka rai la shim ha ka jing ialang jong ka JACATAM bad u Executive Chairman, director  ka MBOSE ban iakren halor ka jingeh jong kito ki skul ban leit shim ia ki jingkylli 2 kynta shwa ban pynlong eksamin kumba la pynmih jingpynbna da ka MBOSE kham mynshwa.Haba pyntip halor kane, u publicity secretary ka JACATAM u Babu Kular Khongjirem u la ong ba ka jingialang ka la ia mynjur ba kito ki skul kiba don jngai na jaka ba buh ia ki jingkylli ki dei ban phah jingthoh sha u Director ka MBOSE ha kane ka taiew ban wan ba kin lah ban leit shim lypa ia ki jingkylli shisien shim baroh.“Hadien ba ngi la iakren bad u Executive Chairman bad u Director ka MBOSE mynta ka sngi,  la iarai ban ailad ia kito ki skul ba don jngai na ki jaka ba buh ia ki kot jingkylli ba kin leit shim lypa noh tangba ki dei ban phah jingthoh sha kine ki heh ka MBOSE ha kane ka taiew ban wan”, la ong u Babu Khongjirem.U la ong ba ka jingbuh ka MBOSE ban ailad 2 kynta shwa ban sdang eksamin ban leit shim ia ki jingkylli klas IX ka long kaba eh shibun ia kito ki skul kiba don sha jngai phew kilometre ban iaid.Ha kawei pat ka liang, U Bah GG Bung Snaitang, uba dei u nongialam jong ka seng UDP Ranikor, ula ai ka jing ai khublei ia ka ophis jong ka MBOSE, kaba la ailad ia kitei ki skul kiba jngai, ba kin shim lypa ia ki jingkylli jongki bad ula iathuh ba ki nonghikai jong kitei ki skul, kin hap ban leit rah bad ka jingthoh sha ka ophis jong ka Board, ha ka Lah Sngi U Blei bad ban pyni ia ki jingeh, ba ki ia kynduh ha ka jingjngai na ka jaka ba ju pynlong eksamin. Lah ban pynkynmaw, ba U bah Snaitang, ula phah ia ka jingujor ha ki khyndiat sngi ba ladep sha ka ophis jong ka MBOSE, ban pynpaw ia ka jingeh, ba ki don ki skul, kiba ka jingjngai kaba haduh 20 ne 40 Kilometre na ka centre eksamin bad katei kan buh jingeh, ia ki, ba kin leit shim ia ki jingkylli jong ki khynnah Class IX, hapoh ka por ar kynta, kaba la buh da ki nongpyniaid eksamin jong ka MBOSE.