Ka Hynñiewtrep Youths Council seng kmie ha ka sngi Thohdieng ka 31 tarik Jymmang 2024, sa shisien pat ka la leit ban khynra biang ia ki nongdih drok ha ki bynta ka Khyndailad bad ha hatei ka jingleit khynra ka seng ka la ïoh ban bat haduh 10 ngut ba kynthup ia arngut ki kynthei.
Lah ban kdew ba ki nongïalam bad dkhot ka HYC ki la leit ban khynra drok ha Khyndailad hadien ba ki la mih na Sadar Police Station ha ka jingleit synran ia u Secretary ka Seng u Bah Isaac Basaiawmoit uba la shah khot hajir ha ki pulit halor ka jingleit pynpra jong ka seng ia ki ïing sah be-aiñ ki bar jylla ha Lum Survey.
Na ka met jong kitei ki 10 ngut, ka seng ka la ïoh ban kurup ia ki drok ba la thep bha poh ki jug ba rit ryngkat ki thyrnia injek drok bad ki tiar iada ha ka shongkha shongman ne ki condom. Hadien ba la kylli tohkit, na ka liang ka seng ka la thang noh syndon ia ki tiar ba la ïoh kurup na kitei ki nongdih drok
Phi don ban ong eiei?