Lait wiak ka Bolero, na ka jingshah ban ha ka twa ha surok Lyngiong

Shillong: Mynhynnin ka sngi ha ka por 2:30 baje eiei nohphai sngi, kawei ka Bolero kaba la iaid shlur, ka la lait salit wiak na ka jingshah lymbub ha ka twa.

Kane ka la jia ha kawei ka jaka kaba khot ka Weipyllun Lyngiong ha ka surok Mawphlang sha Tyrsad.
Katkum ka video ba la phah ki briew na katei ka thain, la iohi ba ka khyndew ka la hap tok shi tok bad katei ka Bolero kaba la iaid sted, ka la lait salit wiak shwa ba ka twa kaba heh sbum kan hap sha surok.
Kane ka twa ka la hap sha surok hadien ba la ther u lapbah ha kine ki ar sngi kynthih ryngkat ka eriong remal, kylleng ki jaka jong ka jylla Meghalaya.

Ha kawei ka jingjia, na ka jingther u lapbah, ka surokbah Shillong-Pynursla-Dawki ka la kylla lyhuh wah ha shnong Lyngkyrdem, ha kaba ka um saw ka la tuid lin haduh ba ka la buh jingeh ia ki kali bad ki briew ba iaid ba ieng.