Khihwin ka hukum pynjari ain shipai ka High Court

Shillong, 12 Naiwieng:
Ka hukum jong ka Meghalaya High Court ban pynjari da ka ain shipai Armed Forces Special Powers Act (AFSPA) ha kane ka jylla ka la pynlong ia ki kynhun bapher bad ki paidbah na rilum Garo ban pyrshah jur ia kane.
Ki seng sain pyrthei kum ka NPP, ka liang synshar ha GHADC ka GHPA bad ki sengbhalang ki la dep pynpaw ia ka jingpyrshah tyngeh ia ka jingthmu ban wanrah ia kane ka ain ha rilum Garo namar ba ka dei iakjakor jong ka jingailad ban thombor jong ki shipai ia ki paidbah.
Ka jingpyrshah ka la pur sha kane ka rilum Khasi ruh ha kaba ki katto katne tylli ki sengbhalang kynthup ka Thma U Rangli Juki (TUR), ka Garo Students Union (GSU) bad ka Civil Society Women’s Organization (CSWO) ki la rai ban pynlong ia ka jingiaid paidbah ha ka sngi Nyngkong ka 16 tarik Naiwieng ha nongbah Shillong ban pynpaw pyrshah ia kane ka jingthmu ban pynjari da ka ain shipai ha rilum Garo.
Ki la rai ban pynlong ka jingiaid paidbah na madan Iewrynghep Laitumkhrah sha phyllaw ka Additional Secretariat. Ia kane ka jingiaid paidbah yn ai kyrteng kum ka Iada ia ka hok longbriew man briew ha Rilum Garo.“Ka dei ka kam kaba sngew khia jur ia ka lawei jong ki paidbah lada ka ain shipai AFSPA yn pynjari ha kane ka jylla bad ngi dei ban wanlang ha kajuh ka rynsan ban ialeh pyrshah ia kane”, la ong ka nongialam ka TUR  ka Kong Angela Rangad.
Ka la ong ba ka long kaba suk ban wanrah ia ka ain shipai AFSPA hynrei kan long kaba eh ban weng ia ka shsien ba la pynjari kumba la paw ha jylla Manipur ha kaba ka Irom Sharmila ka la pynlong ia ka jingshah thngan haduh 15 snem ban dawa weng noh ia kane ka ain hynrei khlem pat urlong.Ka NPP kham mynshwa ka la dep buh jingthoh sha ka sorkar pdeng ban pyrshah jur ia kane ka ain.