Kyntait ka DS Erpakon ban leit iashimbynta sha ka jingiakren iasuk ba khot u DC Ri Bhoi

Nongpoh, 27 Jymmang: Ka Dorbar Shnong Erpakon ha Ri Bhoi, ki la shim ia ka rai ban kyntait leit shim bynta sha ka jingialang iakren iasuk, ia kaba la khot da ka ophis u Deputy Commissioner Ri Bhoi, kaba la khot khnang ia ki nongialam shnong ka Erpakon, nangta ia ki nongialam ka Synjuk ki Rangbah Shnong Ri Bhoi bad ia u trai jong ka RN Sharma Hotel, na bynta ban iakren iasuk noh halor ka jingjia kaba dang shu jia shen hapoh ka shnong Erpakon.

Lah ruh ban kdew hangne, ba ka Dorbar Shnong Erpakon, ka la rai ban beh naphang ia baroh ki nongtrei bar jylla kiba trei hapoh katei ka shnong bad nalorkata, ki la rai ruh ba nangne shakhmat, ba kim shah shuh ia ki bar jylla, ba kin wan ha katei ka shnong, na bynta ba kin leh ia ki kam sengkam sengjam, kata ka dei ba ki la sngew bitar eh, hadien ba uwei u rangbah, uba la tip kum u Bah Kyrmen Lyngdoh Nonglait na ka shnong Erpakon, u la shah pyniap ha uwei u bar jylla bad uba trei hapoh ka RN Sharma Hotel.

Ia ka rai ban kyntait leit iashimbynta sha ka jingialang iakren iasuk kaba la khot da u DC Ri Bhoi, ki nongialam shnong ka Erpakon, ki la pynlong shwa ia ka jingialang kaba la iashimbynta lut da baroh ki riew paidbah hapoh ka shnong, kaba kynthup ia ki longkmie bad ki samla ruh kumjuh.
Ha ka jingialang kaba ki la pynlong ha shnong, la mih ka sur na baroh kiba la leit sha katei ka jingialang ha Erpakon, ba kin kyntait ban leit iashim bynta sha katei ka jingialang, kaba la khot da u DC Ri Bhoi bad kiba la pynneh beit ia kata ka rai ba kin beh lut ia baroh ki bar jylla kiba trei hapoh katei ka shnong bad ruh ban ym shah shuh ia kiwei pat kiba wan thymmai hapoh katei ka shnong.
U Bah Lambor Kharshilot, Secretary ka shnong Erpakon, u la ong ba ka nongrim ia ki nongialam shnong ba kin kyntait noh ban leit iashimbynta sha katei ka jingialang iakren iasuk kaba la khot da u DC Ri Bhoi, ka dei katkum ka rai jong ki paidbah kiba la wan sha ka Dorbar kaba la pynlong da ka shnong, namar baroh ki paidbah ki la pynpaw ba kim donkam ban leit iashim bynta sha katei ka jingialang.