Jia khah khah ki jingaksiden ha surokbah NH-6 Ri Bhoi, ba thurmur palat ki nongniah kali

Nongpoh:Ka jingthurmur palat da ki nongniah kali, ka ju wanrah ia ki jingjia aksiden ha surokbah NH-6 ha Ri Bhoi, ha kaba kum kitei ki jingjia aksiden, ki kham jia khah khah ha kito ki bynta ba ki briew ka National Highways Authority of India (NHAI) bad ba ki ju pyniaid ia ki kali kiba kiew bad hiar tang na kawei ka surok.

Ia kaba kum katei ka jingjia aksiden, la sakhi ruh halor ka jingaksiden kaba la jia hapdeng kawei ka kali Assam kaba don ia u number AS-06-W-7870 bad kawei ka kali kaba don ia u number WB-74-BD-0343, ha kaba ka la jia ha kawei ka surok hajan Shangbangla bad kaba dei ruh ka surok ba ki kali kiba kiew bad hiar, ki pyndonkam na kajuh ka surok, namar kawei pat ka liang ka dang don hapdeng ka jingmaramot.
Ia katei ka kali na Assam kaba dei ka Ford la niah da u Dipanker Deka, katba ia katei ka kali kaba don ia u register na ka jylla West Bengal kaba thmu kiew sha Shillong ka dei ka kali I20 bad kaba la niah da u Vikash Geonka.

Ha katei ka jingjia, ka la wanrah ruh ia ka jingmynsaw ia kiba shong ha kitei ki artylli ki kali, ha kaba ki Pulit ruh ki la leit mar mar sha katei ka jaka bad kiba la pynkit noh sha Nongpoh Civil Hospital ia kitei kiba la mynsaw malu mala ha katei ka jingjia iatyngkhuh kali.