Sah khongreng ka lynti iaid kjat ha Iewduh, bun kiba la mynsaw

Shillong,
12 Naiwieng: Ka lynti iaid kjat ha ki thaiñ ka Iew duh ka ba la shu sah khong reng ka la pyn mynsaw ia bun ngut ki paid bah kiba iaid na katei ka jaka, kawei na ki bynta ba u nongthohkhubor u la wan jngoh hadien ba la pyntip da ki nongshong iew ka dei ha ka jaka kaba don mar pyrshah bad ka Ya Enterprise bad hangtei la iohi ba ki la don ki thliew ki syar ki bym shym la tap bha bad kham harum khyndiat la iohi de ia ka jingma kaba ap ia u paidbah naba hadien ba la pynpra ia ki maw kyndon ban kiew sha Iewduh la siang malu mala da ki lyntang bad katkum ka jingiathuh ki nongshong dukan ha katei ka thaiñ ki la ong ba ki la don bunbah kiba la kylla lyndang ha katei ka jingkieng.
Ha ka jingiakren bad kiba bun ngut ki nongshong dukan ha katei ka bynta jong ka Iewduh ki la ong ba la kumba ar bnai tam mynta u kontraktor ba pyntrei ia katei ka kam u la pynpra ia ka lynti iaid kjat kaba rim, bad u la sdang malu mala ia ka kam hynrei ynta la kumba ar taiew tam ki la ong la shu ieh kumto khlem don ba trei shuh bad kane ki la ong ba ka la pynwit bha ia ka iaid ka ieng u paidbah. Ki la iathuh ba tang kaba ki iohi da la ki khmat ki la don bun ngut kiba la mynsaw ha katei ka jaka namarba kim lah ban kiar ia kitei ki lyngruh lyngram kiba la shu ieh ryngheng ha jaka iaid paidbah.
Kitei ki nongshong dukan kiba ju shong dukan la bun bun snem ha katei ka jaka ki la iathuh ba tang namar ia ka jingieh shrah u kontraktor ba pyntrei ia katei ka kam , ki la duh nong bha naba ki paidbah kim nud tur sha ki dukan jong ki naba ki tieng ioh ki ur. Ki la ud ruh ia ka rukom shna ia katei ka lynti iaid kjat ha kaba ki la ong ba la mang ban rah kham shajrong bad lada iaid beit kumtei ki la ong ba ka dukan jong ki kan dap tang ka um suda ha ka por slap. Ki la kyntu ia u kontraktor ba un shna kumba ka ju long mynshuwa. Kitei ki nongshong dukan ki la kren diaw ruh halor ka jingiap iew khamtam ha kine ki aiom ba la jan ka por Krismas, bad ha kine ki sngi lei ki la iathuh ba tang ka bai wai dukan ruh kim lait shuh.
Katto katne ngut na kitei ki nongshong dukan ki la iathuh ba ki la ia kren bad u kontraktor ban shna kumba ka long mynshuwa, hynrei u la jubab ia ki ba u hap ban shna katkum ka jingbthah ka sorkar. Shuh shuh ki la iathuh ba haba ki wad jingtip balei la shu sah khongreng katei ka jingshna lynti iaid kjat , ki la ong ba la ai daw ba dei namarba ka tnad PHE kam lah ban pyndep ia ki kam jong ka , bad hap ban ap shuwa haduh ban da pyndep ka PHE.