Pynngat ki pulit ha ki kyndon jong ka MMPO bad IPC, ba khynra ki HYC ha Lum Survey

Shillong:U Superintendent of Police ka East Khasi Hills, u Rituraj Ravi u la ong ba ka ain kan synshar bad kito kiba pynkhein kan leh ia kaba donkam.

Kane ka long halor ka jingleit kyndang ka seng Hynniewtrep Youth Council-HYC ha kane ka sngi hatmajai ia ki ïing dara kiba la shna ha Lum Survey.
Haba kren ha kane ka sngi Hatmajai, u SP u la ong ba halor ka jingleit kyndang ka HYC ha Lum Survey, ka tnad pulit ka la dep rejister mukotduma ha ka Indian Penal Code-IPC bad ka Meghalaya Maintenance of Public Act-MMPO. Bad ka jingtohkit ka dang iaid mynta.

Haba pynrem ia kane ka jingjia, u SP u la ong ba ka jingleh ka HYC ka wanrah ka jingsyier ia ki paidbah bad kan pynthut ia ka shongsuk shongsain. U la ong ba ki pulit kin pietngor bha ba ka shongsuk shongsain kam dei ban shah pynthut.
Halor ka jingioh lad ka HYC ban wanrah ia ka Pushilum haduh Them Bjioy, u SP u la ong ba lada ka don ka jingduna ha ka tnat syntiat, kin sa peit bha nangne shakhmat.

“Ia mynta, ngam pat lah ban iathuh namar ba ka jingtohkit ka dang iaid”, la ong u SP.
Lah ban kdew ba ka HYC ka la leit kyndang ia ki ïing ba sah ki suba poiwir ha Lum Survey ha kane ka sngi Hatmajai. Ka la pynap ruh ia ka puhshilum ha Them Bijoy hynrei namar ba ki la shu khynra tang da ka bor met bad ka la byrthen ba lada ki briew kim mih noh na katei ka jaka.
Shwa ia kane, ha ki taiew ba la dep, ka HYC ryngkat ka bor district, bad ki pulit kila pynlong ia ka jingjurip ia katei ka jaka, ha kaba ka HYC ka la kam ba kitei ki briew ki dei kiba shu sah beain bad ka dei ruh ka ktem u drok ha katei ka jaka.