‘Ka Mawpat bad ka Mawtawar ki dei shipara, ym long shongkha’

Shillong, 11 Naiwieng:
Ka adong kaba la sain dur ki longshwa manshwa ka dang ieng haduh kine ki sngi ha ka thaw shong thaw sah jong ka shnong Mawpat bad ka shnong Mawtawar ha kaba kim lah ban iashong kha shongman namar ba ki dei shipara.
Ia kane ka thym mei saindur ki longshwa la kynshew ha ka jingthoh ha ka dur jong ka kot kaba la mih na ka kti bad jabieng jong u Bah Regi nald Susngi uwei na ki nongshong shnong ka Mawpat uba dei ruh u ophisar sorkar jylla.
“Ka Shnong Mawpat bad u Mawpat kor”, ka dei ka kyrteng ka kot kaba lum jingtip shaphang kane ka khana hapdeng kine ki ar tylli ki shnong kiba ka adong ka dang treikam haduh kine ki sngi lada don kiba ialeh pyrshah.
“Ka Mawpat bad ka Mawtawar ki dei shipara, ym bit ban iashongkha shongman. Ha ka por ba nga leit peit kynjatbol sha Mawtawar, I pa jong nga, I la ong ba me wat ju leit I bha samla ho sha Mawtawar namar ba ngi long shi para”, la ong u Bah Reginal Susngi haba kren maitphang halor kane ka kot mynta ka sngi Balang shwa ban pynlait paidbah.
U Bah Reginald Susngi u la ong biang, “Ki don ki kyndon ba pynshong ha u Ryngkew u Basa ha u Matpatkor ha kaba ka Mawpat ka dei ka hymen bad ka Mawtawar ka dei ka para. La don ki adong adit bym long iashongkha shongman bad lada don kiba leh pyrshah, kata ka longiing longsem kam nym roi parum pareh hynrei kan iakynduh tang ia ki jingkordit bad kane ka dang iai jia wat haduh kine ki sngi”,.
“Lada u nong-Mawpat bad ka Nong-Mawtawar kin iapoi kha kin mih ki jingeh ba bun wat haduh ka jingiap ruh”, la bynrap u Bah Reginald Susngi.U la ong ba ka jingpynmih ia kane ka kot ka long hadien ba u la lum thup ia ki jingtip na ki riew tymmen  shaphang ka shnong Mawpat kaba ju ia khot ki briew ia ki nong-Mawpat, “u Mawpat die dieng” namar ba ki nong-Mawpat ki dei ki nongdie dieng kseh ha ki por mynshwa ha Iewduh.Katba u Prof SS Majaw uba pynjlih ia kane ka kot jong u Bah Reginald Susngi, u la ong ba ka Shnong Mawpat, Mawtawar, Mawlai, bad Nongrah ki dei ki shnong kiba la hyndai bah namar ba ki la don lypa shwa ban wan ka sor Shillong ruh.
“Hynrei kaba kham pher napdeng kine, ka dei tang ka Mawpat namar ba ka don ka khana pateng shaphang jongka kaba paw shai ha ka kot jong u Bah Reginald Susngi.Ia kane ka kot la pyllait paidbah da u Deputy Chief Excutive Member (Dy CEM) ka KHADC u Bah Process T Sawkmie, uba la pynpaw ia ka jingsngew tynnad ban mih ki nongthoh ka jaitbynriew Khasi. “Ka jinglah jong u Bah Reginald Susngi ban pynmih ia kane ka kot ka dei ka jingialam jong u Blei ryngkat ka jingkyrshan ka iing ka sem jong I”, la ong u Bah Sawkmie.