Da ki live screen, yn buh ha ka sngi niew vote, yn khang ïa ka jingïaïaid paidbah

Shillong:U Deputy Commissioner (DC) ka East Khasi Hills u SC Sadhu, uba dei ruh u Returning Officer na ka Shillong Parliamentary seat u la ban jur bad ïathuh ba la pyntreikam ïa ka kyndon bad pynjari 144 ha kane ka sngi ñiew vote.

Na ka liang u Sadhu u la ong, “Ngi la pynjari ïa ka kyndon 144 bad ngin ym shah ban don ka jingïalum briew kaba bun ha katei ka jaka bad yn ym shah hi ruh ban ïaid paidbah halor ka jingjop ki kyrtong.”
U la ban jur ruh halor ka jingdonkam ban peitngor ha kane ka sngi. Na ka liang u DC u la ong ruh, “Ki bor pynïaid district kin khmihbniah ha kane ka sngi niew vote lyngba ka video surveillance ban ïada na kino kino ki jingshah pynkheiñ ïa ka aiñ bad ban wanrah ïa ka shongsuk shongsaiñ.”

Na ka liang u Sadhu u la ïathuh ruh halor ka jingdonkam ki lad jingtip ban lah ïakhun pyrshah ïa ki jingtip kiba ïalam bakla, “Ban ïada na ki lad jingtip kiba bakla, ïa ki result yn pyni ha ki live screen ha kylleng ka nongbah Shillong lyngba ka DIPR.” U la pynthikna bad kin don ki lad jingïarap lyngba ki bor ïada, “Kan ym don ka jingïarap ki pulit CAPF; ngi la don la ki jong ki bor pahara na la ka jong ka jylla,” ong u DC.

Na ka liang u Returning Officer u la banjur, “Kumba la ju long ha ki ilekshon Assembly, yn pyrkhing bha ïa ka jingïaid rally jong ki kyrtong kiba jop khnang ban lah kiar na kino kino ki jingjia ïaumsnam.” U DC u la ong ruh ba shabar ki jaka ba ñiew vote, yn buh ïa ki screen ban pyni ïa ki result khnang ban lah ban pynpra ïa ka jingïalum Paidbah.

U Sadhu u la banjur ïa ka jingdonkam ka jingïatreilang jong ki seng saiñ pyrthei ha kane ka sngi, “Kumba 10 sngi shwa ka jingñiew vote ngin ïa kynduh ïa ki party ban pynthikna ïa ka shongsuk shongsaiñ bad ba ki kam kin ïaid kumba la pynbeit.”