Ym pat pyndep jingkieng thew kali

Jowai, 09 Naiwieng:
Ka sorkar jylla lyngba ka tnad Transports haduh mynta kam pat lah satia ban pyndep ia ka Weigh Bridge kaba don ha shnong Nongthymme ha jan ka shnong Saphai na ka bynta ban thew ban who ia ki trok dewiong kiba shallan Dewiong sha Assam khamtam sha Nowkong na Jaintia Hills.
Ka National Green Tribunal (NGT) ka la dep pynmih ia ka hukum khyndiat bnai mynshwa na ka bynta ban pyntreikam ia ka Weighbridge ha Nongthymme- Saphai na ka bynta ba ki nongshallan dewiong ki ioh ban shallan dewiong da kaba iaid lyngba ka surok Phramer- Shangpung-Karompani.
Ka jingbym shym la pyndep ia katei ka jaka thew ia ki trok dewiong ha katei ka jaka, ka la buh jingeh ia ki nongkhaii dewiong kiba shallan dewiong na katei ka surok ban poi sha Nowkong Assam.
Katkum ba long mynta, ka NGT ka la ai lad ia ki nong khaii bad trai par dewiong ban shallan ia u dewiong ba la dep tih tang haduh ka 30 tarik une u ‘Nai Wieng ki la kyntu ia ka sorkar ban shimkhia ban pyndep noh ia katei ka jaka thew.
“Ka jingbym shym la don ka Weighbrige ha katei ka surok ka long ruh ka jingpynkhein ia ka hukum jong ka NGT”, la pynpaw ki nongkhaii dewiong.