Pulom ka jingiatainia ba tieng u MDC ka Mawhati

Nongpoh, 08 Naiwieng:
Ka jingthmu ban pynlong iatai halor ka jaboh ba mih na pham ka Meghalaya Agrovet poultry  ha Mawthei bad 9 mer ba pynlong da ka KSU, Umsning Circle bad ka HNYF, Northern Region ka la pulom noh namar ka jingbym wan u MDC ka Mawhati Konstituensi u Bah James Sylliang bad ka Synjuk ki Rangbah Shnong ka Lum Manik Raitong kaba nongkyr shan ia katei ka kompeni.
Ia ka jingiatai nia ba pynlong ha ka 7 tarik Naiwieng ha Umsning  ban ioh jingshai bad jingbatai bniah halor ka jingkyrshan ia kane ka Agrovet da u Executive Member ka Trade bad Enforcement ha ka KHADC u Bah James Sylliang lem bad ki nongialam ka synjuk ki Rangbah Shnong Lum Manik Raitong hynrei ka jingbym nud ban wan mihkhmat sha kane ka prokram ka la pynsuba jur ba ka lah ban don eiei shalyndet jong ka jingkyrshan ba matlah jongki.
Ha kane ka jingiatai la wan tang ki nongialam shnong ki 14 shnong kiba shah ktah ha kane ka pham, u MDC ka Umsning Konstituensi u Bah Donkupar Sumer.U Bah Peter Kylla, president ka KSU, Umsning Circle, Bah B. Kharnaior, president ka HNYF Northern Region bad u Bah S. Nongkseh, Chairman ka Synjuk ki Rangbah Shnong Nongjri Pyllun, ki la pynrem jur ia kine ki briew kiba pep.
Ki la ong ba ka jingkam u MDC Mawhati ba ki rangbah shnong ka Umsning C&RD Block ki la weng ia ka jingpyrshah ia ka Meghalaya Agrovet Poultry Farm ka long ka bym don nongrim bad la shu kam matlah . “Kane ka dei tang ka jingpynbudnam ia ki Rangbah Shnong kiba ieng ban pyrshah ia kane ka farm naduh ki sngi kiba nyngkong ba thmu ban tei ia kane ka farm”, ong kitei ki nongialam.
Ka jingpyrshah ia katei ka Agrovet ka la long ba ka la pynjakhlia bad pynjaboh ia ki tyllong um kiba sam umbam umdih sha ki 14 tylli ki shnong kiba don hapoh ka thain Umsning da kaba pyntuid ia ki eit bad jakhlia ba mih na ki syiar shapoh ka wah Umtrew bad ruh halor ka jingbym burom jong ki nongpyniaid ia ki bor sorkar naduh ba ka dei ban ioh jingbit na ki tnat Forest, PHE.
U MDC ka Mawhati u ba la kyrshan ia kane ka Agrovet u dei u wei na ki MDC u ba leit khang tala ruh ia ka ha ki snem, bynrap ki nongialam.