Ki paidbah ki pyrta da kaba ong,bom iap, tep im beit ia ki, iathuh ki bahaing u bah Hasmendra

Shillong 4 Jymmang: Ki bahaiing hasem jong u bah Hasmendra kharkylliang, u rangbah ba shah bom iap ha ki paidbah ha shnong Umthlong , ki la iathuh, ba  ha kapor ba ki bom bad shoh kim shem la ailad tang ban kren shikyntien, hynrei ki pyrta beit da ka ba ong, bom iap,bad  tep im beit ia ki.

Haba ioh ban iakren mynta ka sngi saitjain ka 4 tarik u jymmang 2024,ha civil hospital Shillong, ki bahaiing ki la ong, ba nyngkong ki kwah ban iakren shwa bad ki nongpyniaid shnong watla ki la sdang ban bom ia utei u rangbah, hynrei ki kim shem ailad satia ban iakren bad ym tang ba ki shoh ki tied hynrei ki pyndonkam ruh ban siat da ka jri.

“U tei u rangbah u dei u ba la don kum 50 snem karta u ba dei trai na ka shnong Shyrwang ba hap hapoh ka Eastern West Khasi Hills District bad u ba dei ruh u khun swet.

“Ha kapor ba ki paidbah ki beh kthong ia kine ki rangbah ki pyrta da ka ba ong ba kidei ki nongshohnoh hynrei balei pat ha ki social media ki ai pat ba u dei u nong batbor, buh jingkylli ki bahaiing jong u tei u ranghah ba shah bom iap ia ki bahaing jong ka kynthei. Ki la pynpaw ruh ka jingbym  sngewtynnad  ia ka jingkynoh jong ki.

Katei ka jingjia shah bom ia kitei ki 2 ngut ki rangbah kadei ha kapor ba u malik ba ai bylla shna surok ia ki, u la khawai namar ba la dep dung ia ka slep  bad ki don ki ba shet ja katha kine ki 2 ngut pat ki dang ia leit wad kyiad, la iathuh ki bahaiing.

Watla ki la pyrshang ban iakren bad u rangbah shnong hynrei kim sngewthuh namar ba ka bun palat u paidbah .

Shuh shuh ki la pynpaw ba ka jingbymsngew iahap ia ka jingleh jong ki nongshong shnong ba kin shim hi ia ka aiñ ha ka kti.

Kum ban shupynkynmaw hangne ba katei ka jingjia shah bom ia kitei ki 2 ngut kadei ka ba ka jia hynin ka sngi thohdieng ha ka Shnong Umthlong, ha ka ba ki la shah kynnoh ba ki thmu ban  batbor ia kawei ka kynthei samla  bad hadien ka jinghylla bad pyrta shnong ka la mih ka jingshah beh kthong ia kitei ki 2 ngut bad shah bom haduh ba uwei naki, u la khlad noh hashen bad uwei pat u la khlad noh ha civil hospital Shillong.