Ka bha iangi ba ngin shah weng ban ia kaba shah kren jemdaw haba ngi don bad ka HANM, ong u President barim ka HANM Ri Bhoi

Nongpoh, 30 Iaiong: Lai ngut ki nongialam ka HANM kiba kynthup ia u Samla Ajit Makri, President ka HANM Ri Bhoi, nangta u Bah Tirot Sing Nongrum, Vice President ka HANM ha Ri Bhoi, u Bah Dianghun Pnar, President Mawlyngkhung Circle lem bad kiwei ki nongialam ka HANM ha Ri Bhoi, mynta ka sngi ki la wan kren sha ki lad pathaikhubor, na ka bynta ban pynshai ia ki nongrim ba balei ki shah beh noh na ka seng.  

U Samla Ajit Makri, President barim ka HANM, u la ong ba ka daw hi kaba la pynlong ia u ha ryngkat ki para nongialam bad dkhot na ki 11 tylli ki Circle ha Ri Bhoi lait noh ka Nongpoh Circle, ka dei namar ba u President ba rangbah ka seng um ju sngap ia ki jingai jingmut da ki para dkhot kiba don hapoh ka seng.

U la ong ruh ba haba don ka jingialang CEC, u la pynsngew sha u President ba rangbah ka seng, da kaba ong ba u dei ban shongthait noh shipor na ka HANM, namar kum ka seng ka donkam ban ioh ia ka jingshanniah ha ka jaidbynriew, kumba ka HANM ka la ioh jingshanniah ha ki por ba la dep, hynrei namar ba utei u nongialam u treh ban pyndem ialade, kumta ki la iarai ban iamih noh na ka seng ha ryngkat bad ki nongialam na ki Circle bad Unit bapher bapher kiba don ha Ri Bhoi.