Kyndit U bah Prestone, ba lap ka HYC, tang 195 tylli ki longiing, ka jingai jingkhein ia 342 tnum iing ha them Iewmawlong, ka dei kaba bakla

Shillong:Ka Hynniewtrep Youth Council (HYC) lyngba ka Right To Information (RTI) Act 2005, ka la lap ba ka jingai khein ka Shillong Municipal Board ba don 342 tnum iing kiba sah ha Them Iewmawlong, ka long kaba bakla.

Katkum ka jingtip kaba la pan da ka RTI, ka HYC ka la kam ba ki don tang 195 tylli ki longïing ki briew na Them Iewmawlong kiba dei hok ban ioh sah quarter sorkar kiba trei shisha hap ka ophis jong ka Shillong Municipal Board (SMB).
Kane ka jinglap ka HYC, ka la pynkyndit thret ia u symbud myntri rangbah u bah Prestone Tynsong, uba dei u chairman ka High Level Committee namar ba katkum ka jingkhein kaba ka sorkar ka la ju kren barabor ki don 342 tnum iing, kaba la iathir iatai, ban pynkynriah noh ia ki briew kiba sah ha katei ka jaka.
Ka HYC ka la pynsngew ruh ia kane, mynta ka sngi, ha u Symbud Myntri Rangbah, u Bah Prestone Tynsong uba dei ruh u Chairman ka High Level Committee (HLC).

U president ka HYC, u Bah Roykupar Synrem, u la iathuh ba na ka liang u Symbud Myntri Rangbah u la pynpaw ka jinglyngngoh ba ki don tang 195 tylli ki longïing, namar katkum ka jingkheiñ ba la ai sha ka Sorkar da ka tnat Pynroi Sor la ong ba ki don 342 tylli ki longïing kiba ka Sorkar kan pynkynriah na katei ka jaka.
“Katkum ka aphidabit kaba ka Shillong Municipal Board ka ai 342 ngut sha ka Kashari, katba ka jingtip na ka RTI, ka kdew ba ki don tang 195 tnum iing, mano ba thok hangta”, la buh jingkylli u President ka HYC.
“Ngi kren shai ban ai ia ki bym trei ha Municipal, kam shah, namar ba ki dei tang ki nongshong thap”, la bynrap u bah Roykupar.

Kane ka jingleit jong ka HYC ban iakynduh ia u Bah Prestone ka long hadien ba ka la ioh jingtip ba ka Sorkar kan shong ia ka jingïalang ba khatduh bad ki briew ka Harijan Panchayat Committee (HPC) ha ka 7 tarik Jymmang ban wan.
U Bah Synrem u la pyntip ruh ba na ka liang u Symbud Myntri Rangbah u la shim khia ia kane ka kam, bad kular ban khot mardor ia ki tnat ba dei khmih ban pan jingshai. “U Symbud Myntri Rangbah u la ong ban khot ia ki ophisar ka Municipal bad ia ka tnad Urban ban pan jingshai halor kane”, la iathuh u President ka HYC.

Haba kylli halor ka jingwan tuklar jong ki briew ba nabar ia ka jingpynbeit ia katei ka kam, u nongialam ka HYC u la ong ba kane ka dei ka kam ïing jong ka Jylla, bad ki briew kiba na bar kim dei ban tuklar bad u Dy CM um dei ban sngap than ia ki briew ba na shabar, bad bynrap ba lada ka Sorkar ka shim ia ka jingai jingmut jong kita ki briew ba na bar kamut ka ka dei ka Sorkar ka tlot bha.