Ka kam pynkhuid kam dei, kaba hiar pateng thar ia ki kharmetor, ong ka HYC

Shillong:Ka kam pynkhuid jong ka Shillong Municipal Board kam dei ban hiar pateng tang sha ki longïing jong ki kharmetor, namar ba ka dei ka kam sorkar, hynrei dei ban khot da ka jingpynbna paidbah ban aplai lem kiba kwah.

Ia kane la ong ka seng Hynniewtrep Youth Council (HYC) mynta ka sngi, ka la dawa na u Symbud Myntri Rangbah, u Bah Prestone Tynsong ba ka Shillong Municipal Board (SMB) ka dei ban pynmih beit noh da ka jingpynbna (advertisement) na ka bynta ki kam ba lait ha katei ka ophis.
Hadien ba la dep ban iakynduh ia u Bah Prestone, u president ka HYC u Bah Roykupar Synrem u la ong ba kumba ka long haduh mynta ia ka kam hapoh Shillong Municipal Board, ba la trei da ki khar metor la shu ai hiar pateng beit hapdeng para ma ki, katba ki don bun ki samla trai ri kiba la nud ban trei ia ki kam ba trei ki khar metor.

U la iathuh ba ka seng ka la buh ka jingdawa hakhmat ka Sorkar ba kan khot beit noh da ka jingpynbna (advertisement) haba lait kano kano ka kam ha katei ka ophis kumba leh ha kiwei ki tnat Sorkar.
Ha kajuh ka por, hadien ka jingkhynra ia ka jaka kaba don ha Lum Survey ha lyndet ka Them Ïewmawlong, ka Hynnietrep Youth Council (HYC) ka la dawa leit ban ai jingthoh ha u Symbud Myntri Rangbah, u Bah Prestone Tynsong ban shim kam ia ki briew ba sah beaiñ ha katei ka jaka.

U Bah Roykupar u la ong ba ka seng ka la iakren ia ka jingdon ki briew kiba buhai shnong beaiñ ha Lum Survey, namar ki briew ba sah ha katei ka jaka ki long ki bym shngaiñ ki bym ishaniah bad shibun ki kam sniew ki mih na katei ka jaka.
Ha kane ka jingïalang ba la don lang u Deputy Commissioner ka East Khasi Hills, u nongialam ka HYC u la iathuh ba na ka liang u Symbud Myntri Rangbah u la btah ia u DC ban khot kyrkieh ia ka jingïalang lashai ka sngi bad ki tnat bapher bapher.

U Bah Synrem u la ong ba ka seng ka dawa na ka Sorkar ba kadei ban shim kam ia kitei ki briew, bad ka seng kan ap katto katne por halor kane ka jingdawa, bad bynrap ba lada ka Sorkar kam kloi ban leh eiei na ka liang ka seng kam banse ba kan shim kam da lade.