“Wat tei ia ka iing halor ka lyer, hynrei pynlong ia ka jingthmu ba khraw”,  ong u Lat

Shillong, 08 Naiwieng:
U Lat ka jylla u V Shanmuganathan u la pynkup burom da kaba ai khusnam Rajya Puraskar sha 36 ngut ki Guide bad 26 ngut ki Scout ha ka jingialang kaba long ha kane ka sngi Saitjain ha phylla iing u Lat ban rakhe ia ka jingdap 65 snem ka jingseng ia ka Bharat Scouts & Guides.
Nalor kine, u Lat u la sam khusnam ruh sha ki 10 ngut kiba la ioh ia ki khusnam ba kham shalor.
Haba kren ha kane ka sngi, u Lat u la ong ba baroh kiba ioh khusnam khamtam ki 62 ngut kiba ioh ia ka Rajya Puraskar ki dei ban iai trei bad kitkhia. U la kyntu ia ki ban don ka thong kaba shajrong bad ban iakhun da ka jingtrei shitom ban kiew ha ka jingim bad ban kiew sha ka kyrdan National Award (Rashtrapati Puraskar).
U la kyntu ia ki Scout bad ki Guide ban bud ia ka lynti kaba bha da ka jingkut jingmut bad ka jingshitrhem. “Wat tei ia ka iing halor ka lyer, hynrei pynlong ia ka jingthmu ba khraw kaba wan ha ka jingmutdur jong phi”, u la ong.U la ban jur ia ka jingdonkam ban nym tieng, hynrei dei ban don ka jingshlur bad ka jingshynrang ban ialeh ia ki jingeh ha ka jingim, ban tei ia ka imlang sahlang.
Katba u Chief Secretary u Bah PBO Warjri uba dei u President ka Meghalaya Bharat Scouts & Guides u la kyntu ia ki khynnah ban bud bad ieng skhem ha ka nongrim bad ban don ka jingshlur ban ialeh ia ka hok.