Mih paidbah, ban pynkhuid ia u lum jingthang ka Seng Khasi kmie ha Jaiaw

Shillong: Hynnin ka sngi ka 28 tarik u Ïaiong 2024, ki paid ba dang bat dang ksoh ha la ka jong ka niam tynrai, ki la mih paidbah naka bynta ban hiar ban pynkhuid paidbah ïa u lum jingthang ka Seng Khasi Kmie, ba don ha Jaiaw.

Ïa kane ka jingpynkhuid kaba shisien shi snem, la pynlong ïa ka da ka Lum Jingthang Committee ka Seng Khasi Kmie, ïa kaba la wan ban ïashim bynta lang ruh da ki paid ka Seiñ Raij, Shillong. U kongsan ba la wan ban ïadon lang ha kane ka sngi dei u Syiem ka Hima Mylliem u Pa’iem Ainam Manik Syiem, u President bad General Secretary jong ka Seng Khasi Kmie, Rgh O. Pyngrope, Rgh Hainess Marbaniang, ki nongïalam ba hakhmat ka Seiñ Raij Shillong bad ki dkhot nongkit kam ki jong ka, ki dkhot ka Jylli Pyrkhat Kam (JPK) ka Seng Khasi Kmie , ki parakur ki parakha naduh ki riew tymmen ki, rangbah,ki longkmie, ki samla, kynthei bad shynrang bad kumjuh wat naduh ki khynnah ba rit. Ha shwa ban sdang ka jingpynkhuid u Rgh O. Pyngrope President Seng Khasi Kmie, u la shim ïa ka bynta ban kyntiew ïa ka lama jong ka Seng, ïa kaba la pynbud pat da ka nguh ka dem ka khat ka shat ka khnong ka bishar, ka song kwai ka song tympew, kaba la pyndep da u riew Tymmen u Riewsan ka Seng Khasi Kmie u Rgh Skor Jala. Ha kane ka sngi ka Lum Jingthang Committee ka la wan shakhmat ba kan pynkup burom da ki syrnot sah kynmmaw sha ki para kur ki parakha kiba la noh kylluid mynsiem sha u sup u thiar kynshew pisa jong ka Lum Jingthang Committee, ïa kaba la sam bad aiti sha ki da u President ka Seng Khasi Kmie bad kumjuh da u kongsan. Hadien jong kane la ïoh pat sa ïa ka jingkren na u kongsan u Pa’iem Ainam Manik Syiem bad ban pynbud pat sa ka jingïashim bynta ki paidbah ban pynkhuid ïa une u lum kyntang, u lum ba juh pyndep ïa ka leh niam kaba khatduh ïa kito kiba la duh noh ïa la ka mynsiem ksiar ka mynsiem rupa, ynda haba ki la kut noh la uta u sai hukum ka jong ki na kane ka sla jong ka pyrthei. Ka jingïapynkhuid paidbah ka long ïa baroh ki sawdong ki sawkun jong une u lum bad ban sar bad ban sait ïa ki kor shong thait, ïa ki kpep bad kiwei kiwei ki bynta kiba hap hapoh u pud u sam jong une u lum.