Yn sngap paidbah ka Expert Committee, halor ka ka jingdawa Reservation Policy

Shillong:Ka Expert Committee kaba la thung da ka sorkar jylla ban bishar bniah ïa ka State Reservation Policy haba ïa dei bad ka bhah kam bhah jam ha ki kam sorkar hapoh ka jinglong shongknor u nongbishar bala shong thiat u Justice (Retd.) Mr. Mool Chand Garg.

Ka jingïalang kaba ar sien jong ka Expert Committee la pynlong ha Shillong bad ha kane ka jingïalang la donlang ki ophisar na ka tnat Personnel jong ka sorkar Meghalaya.
Ha kane ka jingïalang kaba la long la shim ïa ka rai ban pynmih ïa ka jingpynbna paidbah, ha kaba kin ïa mir jingmut, kin pan ïa ka jingai jingmut, bad ki lah ban kynthoh ha kaba ïadei bad ka State Reservation Policy.

Ha ka jingïalang la shim ïa ka rai ba kin pynlong ïa ka jingsngap paidbah halor kane ka phang hapoh kane ka nongbah Shillong bad ha kiwei ki Nongbah jong kiwei ki District ha ka jylla bad hadien katta kin sa shim jingmut na ki paidbah ruh kumjuh.

Kiwei ki dkhot jong ka kommittee kiba la donlang ha kane ka jingïalang ki long u Justice (Retd.) Dr. Satish Chandra, Prof. D.V. Kumar, Prof. Chander Shekhar bad Prof. Subhadip Mukherjee. Ka jingïalang jong kane ka kommitee kaba kyrpang kan ïa shong biang ha u bnai Jymmang 2024.