Ka jingkem ïa u nongïalam ka KSU, ka long halor ka jingkynnoh donkti pynïap

Shillong:Ha ka kyrwoh kaba la phah mynhynnin ka miet sha ki lad pathai khubor na ka liang jong ki pulit kila kynnoh ba ka jingkem ïa u samla Osternic Marbaniang 34 snem ka rta ka dei halor ka ejahar kaba la ai ha Shella Police Station bad la kynnoh ba u don kti ha ka jingpynïap ïa u Ishan Sing bad u Sobir Dutta ha Ichamati.

Ha ka juh ka por na ka liang jong ki pulit ki kyntu ïa ki paidbah ba kin pynneh pynsah ïa ka shongsuk shong saiñ bad lada don kino kino kiba pynthud ïa ka shongsuk shongsaiñ kin leh ïa kaba donkam katkum ka aiñ.
Ki pulit ka East Khasi Hills District ha ka 27/ Ïaïong/ 2024 ki la leit ban kem sa ïa uwei na ki dkhot ka Khasi Student Union u ba na ka shnong Jaïaw u ba dei ruh u dkhot ka Central Body ha ka por kumba 3 baje eiei nohphai sngi. Na ka jingshah kem jong une u dkhot ka KSU la lah ban ïohi ba ki dkhot ka seng KSU kila ïapoi sha Sadar Police station.

Kum ban shu pynkynmaw ba ha duh mynta ka jingkem ïa ki dkhot ka KSU ka la kiew sha ka 5 ngut bad ïa kiba la kem ha shwa kata 3 ngut ki pulit ki kem na ka jingsuba donkti jong ki bad ka jingjia pynïap klep ïa ki arngut ki bar Jylla kata ha Ichamati ïa kaba la jia ha ka 27 tarik u Lber 2024 bad uwei pat ba la shah kem ka dei halor ka jingjia shah pynïap uwei u bar jylla u ba dei u nongtrei ïing ïa ka ba la jia ha Mawlai Mawroh ha ka 10 tarik u Ïaïong 2024.