Nongpoh: U Bah Speshon Lyngdoh Sylliang, uba la shah shah kynnoh ba u la kam jubor ia ka jinglong kum u Lyngdoh ka Raid Sohkhwai, mynta ka sngi u la mih shakhmat na bynta ban pynshai paidbah, da kaba ong ba ma u kum u Lyngdoh hapoh ka Raid Sohkhwai, la pynkup bor da ka District Council bad nalorkata, u la ioh ruh ia ka Sanad na ka ka ophis u Sirdar ka Elaka Nongpoh Sirdarship.
Katei ka jingpynshai da utei u rangbah, ka dei hadien ba hynnin ka sngi, ba la mih ki riew rangbah na ka Raid Sohkhwai, ia kaba la ialam da u Bah Phidis Syrling, uba ong ialade ba u dei u Lyngdoh ka Raid, kiba la don ryngkat bad ki longsan mansan, ki doloi ki pator bad ki myntri ka Elaka Nongpoh Sirdarship, ha kaba ki la leit ban kiew sha ka Khlaw Kyntang ka Kur Syrling, na bynta ban pynshisha ba kiba lah ban long Lyngdoh hapoh katei ka Raid ki dei tang kiba dei na ka Kur Syrling, ha kaba lyngba katei ka sngi, ki la pynmih ruh ia ki kyntien ba u Bah Speshon Lyngdoh Sylliang, u la kam jubor ialade ba u dei u Lyngdoh Lyngdoh ha katei ka Raid bad kaba la pynlong ia u ba un hap pynshai.
Ha ka jingpynshai u Bah Speshon Lyngdoh Sylliang, la sakhi da ka jingdon u Bah Dolin Tymban Doloi ka Raid Sohkhwai, u Bah Ston Nongkyum Pator, ha kaba u la pynshai da kaba ong ba ia ka jinglong Lyngdoh jong u hapoh ka Raid Sohkhwai, u don ia ki kot ki sla lyngba ka jingpynkup ka District Council bad kumjuh ruh ka sanad bala ai da ka ophis u Sirdar Nongpoh Sirdarship Elaka bad halor kitei ki kot ki sla nga long u Lyngdoh baroh shikatta hapoh ka Raid Sohkhwai.
U la ong ruh ha kano ka rukom u Bah Phidis Syrling, u kam ialade kum u Lyngdoh hapoh ka Raid, haba ki kot ki sla bad ka jingpynkupbor baroh ka don ha nga, la ong u Bah Speshon Lyngdoh Sylliang bad uba la kynnoh ruh ba u Bah Phidis Syrling um dei na ka jait Syrling, hynrei u dei na ka jait Nongtri bad na ka liang ka Iingbishar ruh ka la pynrem ia katei ka jingkam jong u, dei halor kata ka nongrim ba ka District Council ka hap ban kohnguh ia ka hukum ka Iingbishar bad ai biang ia ka hukum ba naduh ka 4 tarik Nohprah 2018 ba u Bah Speshon Lyngdoh Sylliang ba un long kum u Lyngdoh ka Raid Sohkhwai, ha ryngkat ka Sanad kaba la ioh ha u snem 2020 na ophis jong u Sirdar ka Nongpoh Sirdarship Elaka.
Phi don ban ong eiei?