Kylla kali ha Pommura bym lah tehlakam u nongniah, ong U SP “btuid ka kali” ong ka 108

Shillong, 6 Naiwieng:
Mynta ka sngi ha ka por 10baje mynstep, kawei ka kali kaba don ia u number AS-25AC-2441, (Traveller Van) ba niah da U Md. Najrul Khan, kaba leit na Shillong sha Mustaih, West Jaintia Hills, ha ryngkat bad ki nongwan shangkai pyrthei ban shim bynta ha ka tamasa Terre Madre, ka la thung khoh moh ha Pommura, hadien ba u nongniah, um lah shuh ban tehlakam ia katei ka kali.
Ha ka jingjia, ki don kiba mynsaw bad kitei ki kynthup ia U Rajiv Khanna (38), u nong India, uba na California, USA (ii) ka Monica Agarwal (36) na Gurgaon (iii) U Roveen Bhansali na California, USA (iv) U Dijen Deka (32) na Darrang, Assam (v) ka Anneli Sarah Johnson(55) na Sweden (vi) ka Ms. Luisa Valpe (39) na Italy (vii) U Trip Langshiang (75) na Muktiah, WJH (viii) Ka Rajesh Vini Bhansali (40) ka nong india, kaba na California (ix) ka Bhawana Desai (29) na Ahmedabad, Gujarat (x) U Bah Daniel Mawsor (27) na West Khasi Hills, (xi) U Auspin Kharbri (37) na West Khasi Hills bad (xii) ka Bhawana Severbhai (29) na Ahmedabad, Gujarat. Baroh kitei kiba mynsaw, kim shym la shah sumar ha Hospital, lait noh U Dijen Deka,uba don ha ka jingshah sumar ha Bethany Hospital, Shillong, na ka bynta ban peit bha ia ka jinglong ka koit ka khiah jongu.
Kawei pat ka khubor jong ka 108 Emergency EMRI, ba la phah da U bah Aerelius Robert Passah, ka iathuh ba ki nongwan shangkai, kiba wan shim bynta sha ka tamasa Terra Madre, ki dei kiba leit sha Amlarem na Shillong. Kitei ki nongleit jingleit, ki leit da ka Force Traveler bad ynda poi ha Pommura, kaba hap ha Mawryngkneng Block, East Khasi Hills, katei ka kali ka la thung khohmoh, namar ba ka btuid na surok. Ka jingjia, ka dei ha ka 6tarik Naiwieng 2015, ha ka por 9.59baje mynstep. Ka kali 108, ka kit ia hynriew ngut na kitei kiba mynsaw sha Shillong Civil Hospital, ha kaba lai ngut na kitei, la pyllait noh, katba lai ngut ki don ha Hospital. Kiwei pat kiba mynsaw, la pynkynriah sha Bethany Hospital, Shillong, ha kaba uwei na kitei, u don ha ka jingshah sumar ha katei ka Hospital bad u don sa uwei pat, uba la pynkit sha jowai Civil Hospital. Ki lai ngut kiba dang shah sumar ha Civil Hospital, Shillong bad ba la kit da ka 108 Emergency Service Ambulance, ki long ka Sara Johnson (55), ka Luisa Bolte (39) bad u David Strelneck (50).