Shit jubor hynnin ka sngi ha Resubelpara, Ampati bad Umiam, yn nang jur ka jingshit ha ki lai sngi ban wan

Shillong: Hynnin ka sngi, ka jingshit kaba jur, ka dei ha ki bynta jong ka Garo hills bad ha Ri bhoi ruh, ha kaba ka long hapdeng ka 34 degree haduh ka 39 degree. Ha Khasi bad Jaintia hills, ka jingshit, ka long hapdeng ka 24 haduh 27 degree centigrade, ong ka kyrwoh na ka tnat Indian Meteorological Department (IMD).

Kaba shit duh hynnin ka sngi, ka dei ha Resubelpara, ha kaba long 39 degree, nangta ha Ampati 36.3 degree bad ha Baghmara 34.5 bad ha Umiam 34 degree.

Katei ka tnat peit mariang, ka ai jingmaham, ba ha ki lai sngi, ki ban sa wan, kan don ka jingshit, kaba kiew, da 1 haduh 2 degree ha Garo hills bad ha Ri bhoi District bad kan don ruh ka jingshit lhop, ha kiwei ki bynta jong ka South West Garo hills, West Garo hills, East Garo hills, North Garo hills, South Garo hills bad Ri bhoi District.