Ba wad jingtip khaw Rashon, khot hajir ia U Asst.Secy shnong

Mawtapiew,
6 Naiwieng:
Tang na ka daw ba u wad jingtip lyngba ka RTI halor u khaw rashon u ba dei ka bhah jong ki paidbah nongshong shnong ka shnong Mawtapiew, u bah Tyngshaiñ Kharnaior Assistant Secretary Shnong ka Dorbar Shnong Mawtapiew, u la shah khot hajir ha ka dorbar shnong bad la kynnoh ia u ba u dei u nongpyrshah shnong. “Ngam don da kawei pat ka jingmut sniew ban leh pyrshah ia ka shnong hynrei ka jingwad jingtip jong nga ka long ban tip ia ka hok ba ki paidbah nongshong shnong ki dei ban ioh , la khot hajir pynban ia nga bad la kynnoh ba nga pyrshah shnong” ong u bah Tyngshaiñ haba ia kren bad ki nongthohkhubor.U la iathuh ba ym pat shym la lah ban pyndep ia ka jingbishar ia u bad la buhteng noh ia ka bad la thmu ban wanrah biang ha ka dorbar sngi ka ban long ha u bnai nohprah namar ha ka sngi dorbar ba la dep ka dei tang ka dorbar step. Hynrei kaba kham sngew thamula ka long ba ha katei ka dorbar step la pyngnat lang ia uwei na ki Executive Member jong katei ka shnong u bah Lumlang Kharnaior namarba u la ieng ban pynshai ha katei ka sngi khot hajir ba ka jingwad RTI kam dei ka jingpyrshah shnong lane kam dei ba ia leh kes ne ujor pyrshah ia ka shnong hynrei ka dei tang ban wad jingtip , “Tang na katei ka daw , ia nga ruh la pynngat lang jlang kum u nongialeh pyrshah ia ka shnong, ki la kyntait ia nga na ka Executive Member bad kim shym al khot shuh ia ka jingialang Executive Committee ruh” u la ong.
Kitei 2 ngut ki Rangbah ki la ong ba ki nongialam shnong ki la byrngem lypa ia kitei ki ar ngut ba ynda poi ka Dorbar sngi ka ban long ha u nohprah kin pynshitom da kaba tyngeh ia ki kaba lah ruh ban poi sha u pud ka jingshah tait shnong. Kiwei pat ki riew rangbah bad ki longkmie jong katei ka shnong kiba don ha ka liang kiba shah pynduh khaw ki la iathuh ba shuwa ban long ka jingialang mynta ka sngi ka la don ka jingleit rung ing ki nongialam shnong ba la ialam da u Secretary shnong u bah Lukar Kharwar sha kito ki ing kiba ujor bad ha katei ka jingleit rung ing ki la byrngem ban tait shnong bad pynngat ha ki jingeh laad kim weng noh mardor ia ka jingujor jong ki bad ha ka jingsheptieng na ka 9 ngut ki nongujor 5 ngut ki la weng noh.