“Donkam ban kyntiew ia ka pule ka puthi bad ia ka kyrdan ki nonghikai katkum ki kaiphod”

Raymilland Mawroh

Ha ki ri kiba shai kiba don ki nongialam kiba shemphang ki buh ia ki mat (agenda) ha khmat duh ia ki kam pule puthi kaba pynroi pynsan ia ka bor pyrkhat pyrdain kaba tip ryngkat ia ka tipbriew, tiphok, tipblei (moral value) khnang ban sei ia ki sap ki phong lyngba ki skul bad ki kolej, ki skul bah da ka jingbtin lynti bad ka jingialam ki nonghikai ki pynmih ia ki riewkhraw pyrkhat, ki riewstad, ki nongialam sain pyrkhat, ki saiantist, engineer, doctor, professor, technologist bad kiwei kiwe na ka bynta ka bha ka miat ka long briew ka manbriew ha ka imlang ka sahlang hangne ha sla pyrthei. Ban pynurlong ia katei ka phang ngi donkam ia ki nonghikai kiba tbit kiba aiti hok ha ki kyrdan ki bapher bapher ha ki jaka pule kaba la long ka thymmei ban sei ia ki riewstad ki riewkhraw pyrkhat kiba la long kum ka umpohliew ba ai jingstad bad ka jingshemphang khnang ba ngin ieng ha la ki kjat.

Halor kane ka phang u Prof. GG Swell, MP haba kren ha ka snem 1986 halor ka Education Policy ba thymmai u la ban jur ba ka ri ka dei ban niewkor ia ka pule ka puthi namar sha lyndet ka Black Board ki donkam ia ki nonghikai ba biang nadong shadong khnang ban ai ia ka jingstad ka jingtip ba nylla ha ki khynnah bad u la buh ka jingkylli. “Hato ngi khring ia ki nonghikai ba shisha lyngba ka jingsiew kaba dei hok? Bad phim lah ban ioh ia ki nonghikai ba shisha lymda phi tyrwa ia ka tulop kaba iahap kyrdan ryngkat ki lad ki kabu kiba donkam kum ki briew. (“People have to be educated, you can’t get the right type of teacher unless you offer them the proper salary”).

Ha ka 5 tarik Nailur ka dei ka sngikha jong u Dr. S Radhakrishnan u riewkhraw pyrkhat ba dei ruh u President ka ri India ba ar, ka ri India ka ju rakhe ia kane ka sngi ban burom ia ki nonghikai (Teacher Day) bad ka sorkar Meghalaya bad India ki ju pynmih ia ki jingthoh da ka phareng kaba ong, “Manificient buildings and equipment are no substitute for great teacher. The kind of education that we provide for our youth of men and women we secure as teacher. A teacher is a committed man, committed to faith in future of man, in the future of humanity in the future of this country and the world. Teachers according to our tradition, have been sovereign over themselves and servant of people. A true teachers must also ba a seeker. The advancement of knowledge is as essential as the diffusion of it” Dr. Radhakrishnan.

Watla ka Meghalaya ka la dei ka pdeng ka jingnang jingstad ha kane ka thain Mihngi, khamtam ka sor Shillong kaba la Pawnam naduh ki por Assam Province, hynrei ka sorkar Meghalaya ha kine ki 38 snem kam shym lah ban kyntiew ia ka kyrdan ka pule ka puthi bad kumjuh ia ka kyrdan ki nonghikai bapher bapher bad ia ki skul bad kolej, hynrei bun na ki skul/ kolej sorkar, Deficit ki dei ba la tei naduh ki por ka Assam bad lehse dei na kane ka daw ba ha ka snem 1994 ka la mih ka khubor ha u Rupang ba la hiar ka jingstad namar ba rit tulop ki nonghikai ha Meghalaya. Shuh shuh ka la ong ba kim lah ban ioh ia ki nonghikai kiba tbit ha ka science, mathematics bad kiwei kiwei ki subjek bad la shu hap hikai hi da ki nonghikai ki bym dei na katei ka subjek bad ia ka Hindi la pynlong compulsory, hynrei ym shym don ka jingmang pisa na ka bynta ki nonghikai Hindi bad ia ka skul.

Hynrei haduh mynta 2010 kumba la paw la mih bun ki jingeh ha ka liang ka pule ka puthi kaba la ktah ia ka jylla bad kane kan ialam shano ia ka lawei jong ka pule ka puthi ha ka jylla? Lehse ki nongsynshar sorkar, ki management ne Governing body ki leh klet ban buddien tikna ban pyntreihok ia ka kaiphod ka Kothari Commission bad kiwei ki komiti ban kyntiew kyrdan ia ka pule ka puthi, naduh ka Primary, Secondary, Kolei bad Skulbah bad ruh ban kyntiew kyrdan ia ki nonghikai bapher bapher ha ka imlang ka sahlang bad ban ai ka jinghikai ia ki ban pyntbit shuh shuh (professional training) bad ban saindur katkum ka National Education Policy.

Shuh shuh ka sorkar India ka la pynmih ki skhim bapher bapher halor ka phang ban kyntiew ia ka pule puthi ba kynthup ia ka mang tyngka (func) na ka liang ka Tribal Ministry ban kyntiew ia ka pule ka puthi ha ki skul ha ki jaka riewlum North East kaba la mang T. 16 Klur na ka bynta ka skul ba don jaka sah (residential school) ha ki jaka rilum kaba la pyllait ha u Naitung 2010. kumta ka shong ha ka jingstad ka sorkar jylla kumno ki wad lad ban pyndonkam hok ia ki skhim bapher kaba la pyllait da ka sorkar India ban kyntiew ia ka pule puthi. [la sot na ka thup ki artikel barim jong U Rupang]