Rai kyrshan ka BJP Jaiñtia ïa ka kyrtong jong ka NPP

Shillong: Ka Bharatiya Janata Party (BJP)-East Jaiñtia Hills ha ka sngi Balang, ka la rai ban ai ka jingkyrshan ba pura ïa ka kyrtong ka NPP kong Ampareen Lyngdoh ha kane ka ilekshon Lok Sabha ban long la 19 tarik ïaïong.

ïa kane ka rai la shim ha ka jingïalang jong ka party ba long ha Community Hall, Khliehriat West, East Jaiñtia Hills hapoh ka jingïalam jong u District President Bah Commanderful Sana.

U Bah Sana u pyntip ba ïa kane ka rai la shim halor ka jingbthah jong u Myntri Rangbah Duh, Narendra Modi bad ba ka dei ruh na ka bynta ka bha ka miat jong ka District, ka Jylla bad ka Ri.

Ha kane ka jingïalang, la pdiang sngewbha ruh ïa ki dkhot ba thymmai jong ka party da u National Council Member Bah David Kharsati bad u President barim ka BJP Meghalaya, Bah Shibun Lyngdoh.