Dap 100 snem ka Pasteur Institute

Shillong,  4 Naiwieng:
Ka Pasteur Institute, kaba don ha Lawmali Shillong ka la dap pura shi spah snem ha ka jingai shakri ia ki paidbah ka jylla. U Myntri Rangbah ka jylla u Mukul Sangma u la ong ba donkam ban pynkhlain bad ban pynkhie im ban pynkhlain ia ka Pasteur Institute da kaba iasnohkti lang bad kiwei ki kynhun jong ka pyrthei.
Ia ka  Pasteur Institute, Shillong la seng da ka sorkar phareng, ha ka por u patsha Edward VII  da ka jingnoh synniang ki paidbah ha ka por ba dang don ka Bengal bad Assam  ba synshar ki phareng.  Ia u maw nongrim la pyn ieng da u Chief Commissioner ka Assam, u sahep Archdale Earl K.C.I.E  ha ka 4 tarik Naiwieng, 1915. Ka tnad ka koit ka khiah ka la shimti ia kane ha u snem 1987.
Ia kane ka institute la ju tip paidbah kum ka jaka ai snam ha kaba ki briew na kylleng ki wan ban ai snem ha kane ka jaka.
Haba kren ha kane ka sngi u Myntri Rangbah u la ong ba kane ka tnad sorkar ka la pynim ia kiba bun ki mynsiem briew. U la ong baka dei ka kamram jong ka sorkar  ban pynlong ia ka kaba khlain bad kaba bit ba biang ha ka jingshakri ia ki paidbah.
U la ong ba u dang thaw lad ban iakren bad kiwei ki tnad jong kiwei ki ri ban wan iatreilang bad kane ka tnad ka sorkar jylla khnang ba kan long kaba bit dor bad kiwei ha ka pyrthei.
“Lada ngi shim kabu ia ka jingdap 100 snem jong kane ka tnad, ngi lah ban thaw ia ka kabu ia ki briew da kaba wanrah ia kiwei ki briew nabar ban ai shuh shuh ia ka jingpyntbit na ka bynta ban shakri khambha ha ka pateng ban wan”,  u la ong.
U la ong ba katba ka RIMS kaba don ha Imphal ka la kham iaid shakhmat, ka Pastuer Iinstitute pat ka dang sahdien shibun watla ka la long kaba la rim bha.
Ha kane ka sngi u Mukul u la pynlait ruh ia ka kot sahkynmaw jong kane ka jingdap shispah snem. U la sam  syrnot ruh sha ki nongsam ai sngewbha ba ju wan borabor ha kane ka sngi kynthup ia u Philip Marwein bad ka Kong Deborah Shylla.