Ka NPP, ka dei ka kti ka kjat jong ka BJP, ong U ma Vincent Pala

Shillong:U kyrtong MP ka Congress na Shillong Parliamentary constituency u bah Vincent H Pala u la ong ba ki paidbah ki dei ban husiar ban jied ia ka NPP namar ba ka dei ka kti ka kjat jong ka BJP.

U la ong ba ka BJP ka iarap ia ki sorkar jylla ban pyntreikam ia ki kam pynroi da kaba pyndap ram katba ha ka por ba synshar ka Congress ka shu iarap ei beit khlem da pynkit ram.
Haba kren ha ka jingialang ialap elekshon ha Laitumkhrah mynta ka sngi, u bah Pala u la ong ba ka jylla Meghalaya ka dei kaba duk bad ki politishian ki ngop ha ka jingriam ka BJP. U la ong ba ka BJP kam ai ia ka jingiarap ne grant hynrei ka BJP ka ai da ka ram kum na Japan International Corporation Agency-JICA, Asian Development Bank (ADB), World Bank bad na kiwei ki tnad ban pynkit ram ia ki jylla. U la kam ba ha ka por ba synshar ka Congress ka ai kumba 56 hajar klur ia ka thain shatei lammihngi ka India khlem ka ram bad dei na kane, la ioh ia ka surok na Shillong sha Jowai, na Shillong sha Dawki bad kiwei.

Ha kajuh ka por, u la kynthah ia ki nongialam ka Congress kiba ieh ia ka party na bynta ka jingmyntoi shimet jongki, ym na bynta u paidbah. U la kam ba ka Congress ka long kum ka shlem kaba hikai bad pynmih ia ki riew sain pyrthei bad kumba ka long ha kane ka sorkar ba mynta ruh, mar shiteng ki myntri sorkar, ki dei kiba phet na ka Congress kynthup ka kyrtong ka NPP kaba dei ka MLA na East Shillong.
U la kynnoh ba ka jingbuh thong ka BJP ban iatreilang bad kiwei ki party kum ka NPP ka dei namar ba ki angnud ban ioh 370 ngut ki MP ban pynkylla ia ka riti synshar ka ri ban pynduh ia ka jinglong laitluid ka jingmane blei ha ka ri bad ki angnud ban pynbna ia ka India kum ka ri Hindu.

U la kam ruh ba ka BJP kam kwah ban iakhun MP ha Meghalaya namar ba kam sngew poi sha ka thong ha ka elekshon sha ka Lok Sabha hynrei ka pyndonkam da ka NPP, ban pan pat ia ka MP sha Rajya Sabha, khnang ba kan lah ban leh katba ka donkam ha Rajya Sabha.