Byrthen ka DC, ia kiba pynduh khajna

Shillong,  2 Naiwieng:
Ka District Magistrate ka Ri Bhoi District, Nongpoh ka la pynjari da ka kyndon 144 CrPC; da kaba mana ban ieng kai ia baroh ki briew, ki kali shimet bad kali kamai ha shi lynter ka khyrdop khrong pisa ha Umling.   Ka DC ka la pynjari ruh ban iaid kiar ki trok ia ka surok National Highway-40  bad kiba leh pyrshah kin shah trei ha ka ain.
Ha ka jingpynbna ka sorkar ha kane ka sngi Nyngkong, ka DC ka la ong ba ka hukum kan treikam hadien ba la lap ba ki don ki khlemrain (dalal) kiba leh mynleh ieng kai bad leh shalaki ha sawdong ka Umling Integrated Checkgate da ka jingthmu ba sniew ban khrong pisa ia ki trok ban iaid na kaba siew khajna sha ka sorkar bad kane ka la pynduh khajna ia ka sorkar.
Ha kajuh ka por, ka District Magistrate ka la khang ruh ban iaid ki trok kit dewiong lyngba ka surok Nongpoh – Umden Road, Umling – Lailad Road, Lailad – 20th Mer Road,  Umsning – Jagi Road bad na Nongpoh – Nartiang Road, Ri Bhoi District.La pynjari da kane ka kyndon, namar ba ki don ki trok ki iaid beain sha kane ka surok ban lait ka siew khajna ha Umling Integrated Checkgate, la ong ka kyrwoh na ka sorkar.Ka District Magistrate Ri Bhoi District, ka la khang ruh ban shna ing dara ha shi lynter ka surok National Highway – 40, ban pynhap dewiong harud surok.Ha kawei ka hukum, ka District Magistrate ka la khang ruh ia ki kali ban ieng ha petrol pump bad ym shah ban ieng palat ia 2 tylli ki kali ha kawei ka jaka harud surok ka NH-40 na Pahamrioh haduh Umling.