Ym pat lah ban khot ia ka VPP, kum ka seng riewlum, ong u bah Paul

Shillong:Ka seng thymmai ka Voice of the People Party (VPP) kaba don 4 ngut ki MLA ka dei ka party kaba dang thymmai tang ha East Khasi Hills District bad kam pat lah ban ong ba ka dei ka seng riewlum.
U working president ka UDP u bah Paul Lyngdoh mynta ka sngi, u la ong ba ka kynhun ka UDP bad ka HSPDP, hapoh ka shatri ka Regional Democratic Alliance (RDA) kam don eiei ban syier ha kane ka elekshon bad ka don ha ka lynti ban poi sha ka thong.

Haba pynksan ba ka VPP ka dang jngai na ka thong, u bah Paul u la ong ba na ki 12 tylli ki district, ka VPP ka don tang ha ki jaka ba hap ha East Khasi Hills, katba ka Congress pat ka la lut ka bor jongka, ka NPP pat ka iasyllok bad ka BJP, bad kane kan dei ka kabu kaba biang tam ia u kyrtong ka UDP ban poi sha ka thong. “Ka VPP ka dei ka seng thymmai, kam pat don ktem ha kylleng ki jaka, don tang ha East Khasi Hills. Ym pat lah ban khot ia ka kum ka seng riewlum ne regional party ne ka state party hynrei ka dei tang ka party ha ka district”, la ong u bah Paul.

U la bynrap, “Ka RDA ka don ka kabu ha kane ka kynti namar ba ka Congress ruh ka la lut ka bor jongka, ka NPP ka iaksoh bad ka NPP”.
U bah Paul u la ong ba ka jingwan ki briew sha ka jingialang, kam da dei u diengkot ban rai ia ka jingkhlain, namar ba kumba 85 percent ki briew nongthep vote ki dei kiba jar jar bad kim ju wan sha ka jingialang bad kine ki 85 percent ki nongthep vote kim ju pyni shano ne iano kin jied.
Ka jingdon ka UDP 12 ngut nalor ki MLA, ka don sa 2 ngut ki MLA ka HSPDP bad ki MDC, bad kane ka la thew jngai haba iadei bad ka jingioh vote jong u kyrtong u bah Robertjune Kharjahrin ha kane ka jingiakhun ha ka MP elekshon.

Ha kajuh ka por, u bah Paul u la ong ba ka UDP kan pylleit jingmut kham bha ia ka Shillong Parliamentary constituency katba ia ka Tura constituency kan ieh ha ki nongialam ha katei ka thain, namar ba ka party ka dang duna bha ha kaba iadei bad ka jingioh vote haba bishar ha ka elekshon MLA ba la dep bad kam shym la jop wat tang uwei ruh u MLA.