Wat ka UN ruh ka la bthah ban weng ia ka ain iakjakor AFSPA

Shillong, 02 Naiwieng:
Ka jingpyntreikam ia ka ain iakjakor ka Arm Forces Special Power Act (AFSPA) ha kiba bun ki jaka ha kane ka thain shatei lammihngi ka India ka la ka wanrah ia ka jingpyrshah na kiba bun bah ki paidbah kane ka thain.
U Pastor PBM Basa iawmoit uba kyrshan ia ka jingkyrshan radbah ia ka Irom Sharmila  kaba shah thngan la 15 snem ban dawa weng ia ka AFSPA, u la ong mynta ka sngi ba ka United Nation ka la kyntu ia ka sorkar India ba kan weng noh ia kane ka ain.
“Ka rappoteur  ka United Nations (UN) ka Christof Heyns ha u snem 2012, ka la kyntu ia ka India ban weng noh ia kane ka ain kaba ai bor ia ki bor shipai ban leh katba mon ha ki jaka ba la pynbna kum ki bym don jingsuk”, la ong u Pastor Basaiawmoit bad bynrap ba ka AFSPA ka la long ka dak jong ka jingbat ia ka bor kaba palat bad kam dei kaba lah ban pdiang ha ka synshar paidbah’.  “Mynta ngi la poi sha ka 15 snem naduh ba ka  Irom Sharmila ka la pynlong ia ka jingshah thngan ban pyrshah ia ka jingpynjari ia kane ka ain AFSPA. Na ka nga shimet, nga sngew burom bad kyrshan ia ka kaba iakhun ia kane ka ain iakjakor”,  la ong u Pastor Basiawmoit.Hapoh kane ka ain AFSPA, ki shipai ki long laitluid ban thombor tang da kaba shu tharai ban pyniap ia ki briew,  la ong u Pastor Basiawmoit uba ialam ia ka North East Dialogue Forum (NEDF).
“Ka UN  ka la dep phah ia ka jingthoh ban pyndam noh ia kane ka ain AFSPA ha India, hynrei ka dang treikam haduh mynta.  Haba ngi iai dawa ban pyndam ia kane ka ain, ki shipai ki ong ba ki donkam bad ka long imat kumba don eiei halor jongka”,  la ong u Pastor Basaiawmoit.  Ka thain shatei lammihngi ka India ka la shah ktah bha na kane ka ain kaba mynsaw bha bad ha kane ka jylla Meghalaya ruh ka la treikam 10 km ha ki khappud bad ka Assam ka Goalpara district, u la ong. “Ki shipai kim lah ban synshar ha ka ri synshar paidbah. Hato ka jingpyntreikam ia ka AFSPA ka la weng ia baroh ki jingsniew ha ka imlang sahlang?, ka jubab ka long em”, u la ong. U la ong ba kaba kongsan ka long ban kyrshan ki paidbah ban pynlong ia ka sorkar ba kan sngewthuh ia ka jingdonkam ban weng noh ia kane ka ain AFSPA.