Bun ki dkhot ka BJP, kiba diaw mynsiem, ba hap kyrshan NPP

Shillong:Ki nongialam jong ka parti BJP ha jylla Meghalaya ki la pynpaw ia ka jing bym hun bad ki nongialam jong ka parti ha Delhi haba iadei bad ka jing shimrai ka jong ki ban kyrshan noh ia ka kyrtong jong ka NPP ha jylla Meghalaya na ki ar tylli ki Constituency kata na Shillong bad Tura.
Ka rai ban ai jingkyrshan ia ki kyrtong ka parti NPP, la shim rai da ka kynhun ba halor duh jong ka parti BJP ha ka jingialam jong u JP Nadda.

Ki tyllong khubor, ki la iathuh ba don haduh kumba san ngut ki nong pan ia ka tiket na ka parti BJP tang na Tura Parliamentary constituency.
Ha u kyrwoh ba la pyllait da u nongaiktien ka parti BJP u Sambit Patra lyngba ka rynsan X, u la thoh “Lyngba ka jingbthah na u president jong ka parti BJP u JP Nadda, ngi sngewbha ban pynbna ba ka parti BJP kan sa ai jingkyrshan ia ki kyrtong jong ka parti BJP na baroh ar tylli ki constituency ha jylla Meghalaya,ia u kyrtong jong ka NPF ha Outer Manipur Constituency bad ia ka NDPP ha jylla Nagaland ha kane ka elekshon sha Ïingdorbar Thawaiñ Parliament 2024”.

Ki nongialam ha jylla Meghalaya ki la pynpaw ia ka jing sngewkhia kaba jur hadien ka jing pynbna jong u Patra ban ai jingkyrshan ia ki kyrtong jong ka parti NPP bad ka parti kan ym pynieng kyrtong satia.
Kane ka jing pynbna ka la pynsngewsih ia ki nongtrei jong ka parti kiba la pynpaw ruh ia ka jingsmgew rem, ka la don ruh ka jingiakren hapdeng jong ki nongtre jong ka parti ba kin pynlong da ka jingiehnoh kam na ka parti BJP, hadien kane ka jingpynbna.
Na ka liang u nongialam ka BJP ba khmih ia ka Meghalaya Dr M Chuba Ao, u la pyntip ba ki Nongialam na Delhi kila iohi ba ka party (BJP) kam idon jingkyrmen lyngba ki jingwad bniah kumta ban pynieng kyrtong ha Meghalaya dei na kane ka daw ba ka la rai ban kyrshan noh ia ka National People’s Party (NPP).

U la ong ruh ba ka rai jong ka BJP ban nym pynieng kyrtong ha ka elekshon Lok Sabha na Meghalaya ka la mih hadien ka jingkhmih bniah ba ka party kan ym poi sha ka thong. Kumta ngi la rai ban kyrshan noh ia ki arngut ki kyrtong ka NPP na baroh artylli ki constituency ka Shillong bad Tura”.
“Shuwa ba ngin shim ia ka rai, ngi la pynshong nongrim ia ka jingioh vote ka party ha ka elekshon Lok Sabha 2009, 2014 bad 2019 ha Shillong constituency bad ha Tura constituency kaba la iakhun tang ha u snem 2019. Nalor kane, ngi la bishar ruh ia ka jingioh vote ha ka elekshon MLA 2023 kaba la neh hi kumjuh”.

“Ki don ruh ki jingiohlum jingtip kiba la saphriang ba u wei na ki kyrtong ba pan tiket na Tura u dei u ba don ia ki mukotduma kam bymman, u la pyrshang ban pynkhih da kaba iehnoh kam hapdeng ki nongtrei jong ka parti, hynrei ngi kwah ban pyntikna ba baroh lyngba ka jingkyrshan jong u state president,ki nongtrei bad ki nongialam ki nongialam ki trei shitom ba baroh kin dang ioh ia ka jingshaniah. Kum ki nongialam jong ka parti ha jylla Meghalaya ngi pynpaw ia ka jing sngewkhia jong ki nongtrei jong ka parti ngi kwah ba ka sur jong ki dei ban ioh sngew ngi kyrpad ia baroh ki nongtrei jong ka parti ba kin long kiba ia tylli bad pynleit jingmut ha ka thong na bynta ka jingbha jong ka jylla bad ki paidbah”.
“Kumba ka thong jong ka parti BJP ka long ka ri hakhmat duh, ka parti ba ar bad ialade hadien duh,ngi kohnguh bad burom ia ka rai jong ka CEC bad ki hukum na ki ba halor” ong u heh jong ka seng.