Yn hikai shoh doh ka NESFAS ia ki briew ka jylla

Shillong, 01 Naiwieng:
Ka NESFAS bad ka Institute of Hotel Management, Shillong kan pynlong ia ka jinghikai shoh doh kaban long shi bynta jong ka International Terra Madre (ITM), ban nang pyntbit  ia ki nongshoh doh ka jylla.
Ia kane ka jingai jinghikai yn sa pynlong ha ka sngi ba-ar bad sngi ba-lai ka ITM ka ban long ha ka 4 bad 5 tarik u Naiwieng. Ha ka jingai jing hikai yn wan u Jürgen Kroeber ba na Germany u ban ai jinghikai halor ka sap jong u ban shoh doh bad ban pynmih ia ka doh bala long ban bam. Ki Navajo na Amerika kin pyni ia ka sap halor ka rukom ri ia ki jingri jingdup bad ka sap ban shoh doh da ki rukom ot bapher bapher.
Ka Seng ki Nongdie Dohsniang ka East Khasi Hills Butcher Association ruh kan iadon bynta halor ka rukom shoh doh bad ka rukom ot ia ka doh sniang nalor kiwei kiwei. Ia ki doh bala ot ha kane ka jingai jinghikai yn pyndonkam ha ka International Mei Ramew ka ban long ha Mawphlang, la ong ka kyrwoh khubor na ki bor pyniaid kane ka Tamasa Bam Tynrai.