Shah kem sa uwei ba suba donkti pynbthei bom ha Ïew Mawlong

Shillong:Uwei u samla ula shah kem ha ki pulit halor ka jingsuba donkti ha kaban pynbthei bomb ha Them Ïew Mawlong bad mynta ka jingïoh kem ïa kiba don kti ka la kiew sha ka 4 ngut.
“Ngi la ïohkem sa ïa uwei u briew uba saw, uba donkti ha ka jingpynbthei bomb uba la tip kyrteng kum u Sansharbha Makdoh 24 snem ka rta, ba shong basah ha Umroi, Ri-Bhoi,” la ong u Superintendent of Police ka East Khasi Hills u Rituraj Ravi.

“Ka jingtohkit halor katei ka jingjia kan dang ïai bteng ha baroh ki liang,” ula ong.
Ha ka 19 tarik u Lber ki pulit kila kem ïa u Namphyrnai Lyngdoh Peiñlang 21 snem ka rta uba na ka shnong Peiñlang bad la kem ïa u na Mairang, Eastern West Khasi Hills bad la wanrah noh sha Shillong bad udei uba la suba jur ba udei u donkti hakhmat eh halor katei ka jingjia.

U SP ula pyntip ba u Namphyrnai udei uba don ka jingïadei bad ki dkhot jongka Hynñiewtrep National Liberation Council (HNLC) bad ula pynpaw ba ki pulit kin pynngat ïa baroh kiba donkti ha ka kam ïasylla, kiba donbynta lang, kiba bei tyngka bad kiba pynïaid ïa ka kam ban pynbthei bomb.

Ha ka 11 tarik u Lber, ki pulit kila kem ïa u Bah Tarson Lymba 58 snem ka rta uba dei u nongïalam ka HNYF bad la kem ïa u na Dawki katba ïa u Ebakordor Nongpluh 26 snem la kem na ka thaiñ Malki, Shillong hadien ba ka la don ka jingjia jong ka jingpynbthei bomb.