U Bah Vincent u dei ban ai sakhi ba leh beiñ Khristan ka BJP, ong u bah Kharkrang

Shillong:Haba kheiñ ba kam ïahab ka jingkren u nongïalam ka Congress Bah Vincent H Pala pyrshah ïa ka BJP bad ka jingïalam bakla ïa u paidbah, ka Meghalaya BJP kala dawa ïa une u MP ka Shillong ba u dei ban ai sakhi ïa kawei ka jingjia ba pyni ïa ka jingbym burom ka BJP ïa ki Balang lem kumta u dei ban nguid noh mardor ïa kaei kaba la kren.

“Ka BJP Megha laya kala kdew ïa kiba bun ki khep ba u Myntri Rang bah Duh ka Ri ula leit leh burom ha ki Ïingmane bad kumjuh ruh ïa shibun ki kam bhalang ki paid Khristan ba la leh da ki Nongïalam ka party ha Jylla,” ong ka party ha ka kyrwoh.
Ka BJP ka la pynkynmaw ïa u Bah Pala, ba ha ka prokram rakhe Khristmas ba la pynlong ha Ïingsah u Myntri Rangbah Duh, u Narendra Modi ula ai ka jingïaroh ka ba khraw ïa u Jisu Khrist bad ïa ki jinghikai jong u.

Ka Meghalaya BJP kala pynkynmaw ruh ïa baroh ba ha ka por rakhe Khristmas, ki nongïalam ka Party ba kynthup ïa u Bah A.L.Hek bad kiwei kiwei, ki la pynlong ïa ki prokram na ka bynta ki khynnah, bad pynphuh mut phuhmat ruh ha kylleng sawdong, kaba long pyrshah ïa kaei kaba la kren da ki nongïalam kum u Bah Vincent Pala.

U Nongaiktien ka BJP Bah Mariahom Kharkrang ula ong, “Ka Congress ka tip bha ba ki kabu ïa ka kila nang lip rong katba nang ïaid ki sngi bad ka bok jong ka BJP ka la nang paw bha. Kum kine ki jingkynthoh ki dei tang ka buit bad ka jingpyrshang kut lad ban ïoh ïa ka vote sngewlem. Ki paidbah kila ïohi lyngba ïa kum kine ki jingïalehkai la slem bha bad kin ai vote sha ki bym pynïakhleh niam, vote sha u/ka kyrtong BJP ha kane ka ilekshon MP ban wan.”