“Ngam don daw bad ka UDP, nga rung NPP, ba ka trei na bynta u paidbah”

Nongpoh:U Bah Donboklang Khymdeit, MLA barim ka Mawhati bad uba long ruh kum u President ka UDP ha kine ki por ba la leit, kata shwa ba un mih noh na ka UDP, u la ong ba ka jingmih noh jong u na ka UDP, kam dei ba u don daw bad ka UDP ne iano iano ki para ba iatreilang hapoh ka Party, hynrei ka jingleit pyniasoh jong u sha ka NPP, ka dei namar ba u la iohi bad lap ba ka dei ka Party kaba la lah shisha ban wanrah ia ka roi ka par ha Ri Bhoi bad ha ka jylla hi baroh kawei.

Lyngba jong katei ka sngi, ba u Bah Donboklang Khymdeit, u la pyniasoh sha ka NPP, u la pynpaw ruh ia ki kyntien ba ma u lem bad ki nongbud jong u kiba la rung NPP, kin sa trei shitom, na ka bynta ban pynkhlain ia ka NPP bad khamtam eh ha kaba kum kane ka por ba la dei ka por ban pynthymmai noh ia ki MP, ba kin trei shitom ban pynjop don burom ia ka Kong Ampareen Lyngdoh ha kane ka jingjied MP na Shillong Seat.

“Nga da sngewkmen eh, haba nga iohi ba ki heh jong ka Party NPP kin hiar Nongpoh, ban pdiang burom ia nga lem bad ia ka Kong Rona Khymdeit kumjuh ruh ia ki nongbud bad kane ka pynpaw ia ka jinglong ba kham pher ba bha jong ka Party NPP”, ong u Bah Donboklang Khymdeit.