Ki politishian ka Meghalaya, ki heh nia tang ha rynsan, ong ka KSU

Shillong:Ki politishian jong ka Meghalaya ki heh nia tang ha rynsan ban kren katba kiwei ki leit tur shaduh khappud ruh haba don kano kano ka jingjia ba shah lehbien ki paradoh parasnam.
“Kane ka dei kata ka jingpang ka jaitbynriew”, la ong u general secretary ka Khasi Students Union (KSU) u samla Donald V Thabah mynta ka sngi.

Ka KSU ka la iaid lynti sha ka 46 snem eiei haduh mynta bad bun ki mat ki jura kiba ka la iakhih naduh ki snem 1978 eiei ter ter haduh kine ki sngi, ki sah kut khlem urlong.
U samla Donald u la ong ba ki samla kiba bun kila aiti ia ka jingim, kila shah set phatok hynrei ki briew kiba don ha ka bor, kam don satia ka jingkut jingmut ban pynurlong ia ki mat.

“Lada peit ia kiwei ki jaitbynriew, haba peit ia ki mat kiba iadei bad ka ri bad ka jaitbynriew, ki nongialam ki leit ban iakhih haduh Parliament, kum ka jingpynrung ia ka ktien Bodo ha ka khyrnit ba phra ka riti synshar ka ri, ka jingdawa ia ka Territorial Council, ki MP ki la leit iakhih haduh Parliament ruh. Ngi iohi ha ka jingkulmar ka Assam bad Mizoram, baroh ki MLA ka Mizoram naduh liangsynshar bad liangpyrshah ki leit tur sha khappud, katba ki politishian jong ngi pat ki kut tang haba kren ha rynsan ialap elekshon, bad ki shu iakynthoh uwei ia uwei pynban para maki bad kane ka dei kata ka jingpang ia ki nongialam jong ngi”, la ong u bah Donald.

U la ong ba kane ka dei namar ba ki nongialam jong ka jaitbynriew kim don ka jingiohi jngai.
Na ka seng KSU lem bad kiwei kin ym shongthait hynrei kin iai trei ia ki jingeh jong ka jaitbynriew.