Mynsaw jur u nongniah, ba tynrah ka trok nadien ka trok ba ieng ha Nongpoh

Nongpoh: Ha ka jingjia aksiden kaba la jia hynnin ka miet ha surok NH-6 hapdeng ka Sor Nongpoh, u nongniah jong kawei ka Trok kaba don ia u number ML-05-Z-9460, u la mynsaw jur, kata ka dei hadien ba ka Trok kaba u niah, ka la leit ban tynrah nadien jong kawei kaba don ia u number NL-01-G- 6729, ka Trok kaba ieng ha surok ha Nongpoh.

Katei ka jingjia ka la jia hynnin ka miet ha ka por 10 baje eiei mynmiet, ha kaba katei ka Trok kaba kiew na Guwahati, hynrei haba la poi ha Nongpoh, ka la leit ban tynrah beit nadien jong ka Trok kaba don ia u number kaba don ïa u number NL-01-G-6729, kaba la ieng ha surok nabar ba sniew ka Taiar.

Utei u nongniah jong katei ka Trok ba mynsaw, u dei uba la tip kum u Rajendra Das, 28 snem na 8Mile Guwahati bad katei ka trok kaba ieng ha surok pat la niah da u Lamshwa Pakyntei ha ka rta kaba 44 snem.
Tang mar ia iohi ia katei ka jingjia aksiden bad ba u nongniah u la sahkut hapoh kali, ki paidbah ki la leit ban iarap ia utei u nongniah ban sei napoh kali, kumta kham hadien ynda la wanpoi sa ki Pulit ka Nongpoh Police Station, la lah ban sei ia utei u nongniah bad ia kaba la pynkit noh mar mar sha jaka sumar.