Da lei lei ruh ngin ym shah ne ai NOC ban tih Uranium, ong u CEM

Shillong:U CEM ka KHADC u Bah Pynïaid Sing Syiem haba ïakren bad ki lad pathai khubor, u la kren da kaba shai ba ka KHADC kan ym ai jingbit ne NOC na ka bynta ban tih ïa u marpoh khyndew uba rem dor bha ha ka pyrthei u Uranium.

Ïa kane u la pynshai halor ka jingmih khubor ha kine ki sngi na kawei ka seng kaba la tip da ka North East Sunshine Trust (India) kaba la register ha Shillong ha u snem 2022 bad kaba ai jaka treikam ha ‘Kensington, Kynton-U Mon, Lad Nongkrem.
Kane ka NEST (India) lyngba ka Founder Trustee bad Chairperson Kong Elizabeth Matthews Nongbri, ka la phah da ka dorkhas sha u Dr Jitendra Singh, Myntri Khynnah ka Department of Atomic Energy, ka Sorkar India ba kyrpad ban pynim biang ïa ka kam tih Uranium ha Meghalaya.

Halor kane na ka liang u CEM u la ong, “Naduh ba sdang ka KHADC ka la dep kren da kaba shai ba kan ym ai jingbit la kidei ki kompeni shimet, ne ka tnat Sorkar jylla bad wat na ka sorkar Pdeng ban wan tih, ban khlong bad ban wadbniah ïa u Uranium uba don ha ka jaka ka KHADC khamtam eh ka Domïasiat West Khasi Hills District.”

U la ong bad pynthikna halor kane ka jingmut ba shisha ka KHADC ban ym ai NOC ban tih Uranium da kaba ong, “Ka KHADC kan sa phah da ka shithi ban pynkynmaw ïa ka sorkar jylla, ka Sorkar Pdeng ba ka KHADC naduh mynshwa bad haduh mynta ruh kan ïaibteng beit ban khang ïa ka kam tih Uranium.”