Jler u MDC ka Mawhati, pynshisha ba ngi weng ia ka jingujor: RS Umsning

Nongpoh, 30 Risaw:
Ki Rangbah Shnong ka thaiñ Umsning ki la ther kylla ia u MDC ka Mawhati, uba dei ruh u Executive Member (EM) ba peit ia ka tnad Trade u Bah James Sylliang, ba u la shu jler bad lamler ba ki la weng ia ka jingujor pyrshah ia ka kompeni ri syiar ka Agrovet ha 9mer bad Mawthei.
Hadien ba la shah thad ha u EM ba la mih ha ki lad pathai khubor, ki  Rangbah Shnong na ka thain Umsning Umsning kynthup ka Umsning Lumumpih, Umsning Lum Roman, Umsning proper A, Umsning Patarim lem bad kiwei kiwei, ki la pynlong ia ka jingialang kyrkieh mynta ka sngi bad ki la ong ba ka jingong u MDC ka Mawhati ka dei kaba shu lamler namar ba kam don satia kano kano ka jingweng ia ka jingujor pyrshah ia katei ka kompeni ri syiar.
Ki Rangbah Shnong ki la ong ba ka jingkam jong u MDC ka Mawhati ka long ka bym shongnia bad  kila dawa ba u MDC ka Mawhati u dei ban pynshisha lada don kino kino ki jingthoh jingtar ba ki rangbah shnong ka Umsning ki la weng shisha ia katei ka jingpyrshah ia kane ka pham ri syiar bad lada um lah ban pynshisha kan pynpaw ba u dei u MDC riew thok riewshukor uba pynbudnam sniew ia ki rangbah shnong Umsning.
Ki la sngewbitar ia ka jingkynthoh jong u MDC ka Mawhati Konstituensi ba kila weng noh ia ka jingpyrshah ia ka jingbuh ia ka Pham ri syiar jong ka Kompani Agrovet ha 9 mer bad Mawthei.
Kine ki rangbah shnong ha ka kyrwoh kaba la phah sha ki lad pathai khubor, ki la kynthoh kylla ba kane ka jingkam jong u tei u MDC ka long kaba bym shisha bad kaba la shu kam khlem kano kano ka nongrim.
“Ki Rangbah Shnong kiba hap hapoh Umsning da lei lei ruh kin nym weng satia ia la ka rai ban pyrshah ia katei ka pham ri syiar”, ki la ong bad bynrap ba kane ka pham ri syiar  ka pynjaboh bad pynjakhlia ia ka tyllong um ba ki shnong kiba don ha Umsning ba ju pyndonkam ban bam ban dih kaba la pynbit pynbiang da ka tnat PHE”.
Lah ban kdew ba u MDC ka Mawhati u Bah James Sylliang, u ba dei ruh u EM ka Trade& Enforcement, u la ong hapoh ka iing dorbar ka KHADC dang shen ba ki rangbah shnong ka thaiñ Umsning ki la weng noh ia ka jingujor pyrshah ia ka kompeni Agrovet kaba ri syiar ha kitei ki jaka.