Ka jingdawa pynkylla reservation policy, ka la ktah kylla iangi mynta, ther U MLA barim ka Nongstoin

Shillong:U MLA barim ka Nongstoin u bah Macmilan Byrsat ula ong ba ka jingpynkhih ka Voice of the People Party (VPP) ia ka Reservation Policy ka jylla, ka long kumba pynhap bom ka America ia ka nongbah Hiroshima ka ri Japan.

U bah Macmilan uba dei u nongialam ka NPP, ula iashim bynta ha ka jingialang ka NPP Mylliem Block, mynta ka sngi ha Mylliem Rngi.
Haba kren ia ka jingktah na ka jingpynkhih ia ka Reservation Policy, u bah Macmilan ula pynkynmaw ia ka jingkren u rangbah shipai ka Japan ha ka thma bah kaba ar, ba ka jingleit hiar thma ka Japan ia ka Pearl Harbor ka America, dei ka jingleh bymman kaba bakla tam, haduh ba ka nongbah Hiroshima, kala kylla dpei hadien ba la shah ther kylla da u bom ha ka America, haduh bym mih eiei shuh haduh mynta.

“Nga kynmaw sah ia ka jingong u rangbah shipai ka Japan ha ka thma bah ba ar ka pyrrhei, ba u ong ba ngi (Japan) ngi la leh ka kam bymman kaba jur ban hiar thma ia ka Pearl Harbour ka America, haduh ba kylla dpei ka nongbah Hiroshima bad ym pat mih eiei haduh mynta. Kane ka juh ka jia ia ka jingpynkhih ia ka Reservation Policy ha ka jylla”, la ong u bah Macmilan.
Ula bynrap, “Kajuh ba ngi la ktah ia ka Reservation Policy, ka Reservation Roster system kaba ktah kylla ia ngi mynta”.

U bah Macmilan ula ong ba namar ba shah ialam bakla, ki paidbah ki la sngew shongshit bad don iwei I longkmie ha Nongstoin i la ong ba ki khun jong I, kiba la nang la stad, kin shah khot thungkam namar ka Reservation Policy. “Ngi shah ialam da ka jingsngew, ngi shah ialam bakla. Nga dei uba smat ban pule kot khubor, ka don ka jingpynbna ha u snem 2021, na bynta ki 35 tylli ki MCS (Meghalaya Civil Services), hynrei ha u 2023 la pynmih kawei ka jingpynbeit ne corrigendum, na ka 35 la mang mar 14 ia Khasi-Jaintia bad Garo bad 7 ngut la mang ia kiwei na ka daw ka Reservation Roster. Baroh shi katta, kiba long MCS, kin dei tang u Khasi-Jaintia bad Garo hynrei lyngba kane ka Reservation Roster, mynta yn sa iohi ia u bym dei Khasi-Jaintia ne Garo hynrei da kiwei pat ki jaitbynriew ban long MCS”, la ong u bah Macmilan.