Hapdeng ka jingiatan kaba jur, ioh u draibar, ia ka tiket u sing

Shillong, 29 Risaw:
Hapdeng ka jingiatan tyllai kaba jur bha ha kaba la don haduh saw ngut ki kyrtong kiba la pan tiket na ka seng HSPDP ha kaba khadduh ki nong ialam rangbah katei ka seng kiba hiar naduh Shillong ryngkat bad ki Primary Unit bapher bapher jong ka Nongstoiñ Area Unit mynta ka sngi ki la shim ia ka rai ba khadduh ban ai ia ka tiket sha u nongñiah kali u Maieid Hoping u bahduh Daiostar Jyndiang.
Ki la don haduh 4 ngut ki kyrtong kiba la pan tiket na katei ka seng bad kita ki long ka kong Fenela L Nonglait,bah Doffely L Nonglait kiba long ki pyrsa kur u Maieid Hoping , nangta de la don sa u MDC ka Nongstoiñ u bah L.G Nongsiej bad u bahduh Daiostar Jyndiang uba dei u nongñiah kali u maieid Hoping.Hynrei napdeng kitei ki 4 ngut ka HSPDP ka la rai ban ai tiket sha u bah Jyndiang.
Ha shuwa ban shim ia katei ka rai ka HSPDP ka la pynlong ia ka jingialang paidbah ha Nongpyndeng, Nongstoiñ ha kaba la wan ban ia shim bynta da kumba 500 ngut ki paidbah nongkyrshan ka seng HSPDP hynrei ha shuwa ban shim ia ka rai ki nongialam rangbah katei ka seng ki la ailad tang ia ki President bad Secretary jong ka Primary Unit Nongstoiñ ba kin shong pyrkhat hano kin bynshet ia ka tiket na u sing. La ban kdew ba shuwa ban sdang ka jingialang la iohi ba ki la don bunbah ki kali kiba la tuid sha ka jaka long jingialang bad kiba la teh da ka lama u Sing.
Lah ban pynkynmaw ba ha ka 24 tarik u risaw u Rupang u la ia kynduh kyrpang ia u bahduh Daiostar Jyndiang u nongñiah kali jong u Maieid hoping uba la ju ia don ryngkat ryngkat ha syndah jong u haduh ka sngi ka jingiap noh jong u Maieid Hoping bad ha katei ka jingiakynduh la ioh ban ia kren bad u ia kiba bun ki mat. Hynrei kawei na ki mat kaba ym lah shuh ban klet ha katei ka jingiakynduh ka dei ka jingpynpaw jong u bahduh ba ka jingmih jong u ban ia khun ha kane ka elekshon ka dei lyngba ka jingpynsawa jong u Maieid hapoh ka dohnud jong u man ka minit bad man ka kynta ba u dei beit ma u u ban mih bujli ha ka jaka jong u. Shuh shuh ha katei ka jingiakynduh u bahduh Jyndiang u la ong ba katei ka jingphah ia leh elekshon jong u Maieid ia u kam dei ka sien kaba nyngkong hynrei ka dei ka jingkren kaba na ka por sha ka por kaba u la pynbor teng ruh ha u snem 2009 ba un ia khun ia ka MDC elekshon na Mairang Konstitwensi.“Man ka minit bad man ka kynta , ka maian bad ka sur u Maieid ka sawa ha nga ba ngan ia khun elekshon, ngan ia khun khlem pisa bad ngam don pisa hi ruh, bad ngam don kali hi ruh, ngan bud ia ki nuksa jong u Maieid” ki dei ki jingkren u bahduh Daiostar Jyndiang ha ka jingiakren kaba markhmat bad u Rupang ha ophis treikam ka HSPDP ha Nongstoiñ khyndiat sngi shuwa ban pynbna ia ka tiket na katei ka seng.