Shah dung uba ñiah kali tourist, haduh ban da ïap

Shillong:Ki riew runar ki la pynïap dusmon ïa uwei u nongñiah tourist taxi ha Nongstoiñ, West Khasi Hills ha ka mied shiteng synnia.

Kane ka jingjia kala jia ha ka por kumba 12:15 baje eiei ha Kynroh Taxi Stand, ong ki Pulit kiba pyntip ba une u nongñiah kali tourist ba kamai Nongstoiñ-Shillong, u dei uba tip kyrteng u Macborn Bonnyson Kharbani uba shong ba sah ha Upper New Nongstoiñ.

Ki bahaïing hasem haba ïakren bad ki nongthoh khubor kila ïathuh ba ha kane ka mied, u Macborn u dang shu dep pynhiar lut ïa ki briew kiba wan na Shillong bad thmu ban wanphai noh sha la Ïing hynrei haba poi ha jaka pynïeng kali, saw ngut ki briew kila ker kut ïa u bad kila kynroi ryngkat ka tim sih tim sang.
Ki ïathuh ba ha katei ka por, uwei u briew uba dung da ka wait na ki bynta jong ka shadem jong u Macborn haduh ba ula kyllon ha madan na katei ka jingshah dung.

Ki la ïathuh ba haba ïoh jingtip ïa kane ka jingjia, kila mareh pynsted sha katei ka jaka pynïeng kali bad kila pynkit noh mar mar ïa u sha Nongstoiñ Civil Hospital hynrei ynda poi ha kane ka jaka sumar, ki doktor kila pyntip ba une u samla ula khlad.
Kiba haïing hasem kila leit ban ujor da ka ejahar halor kane ka jingjia bad ki Pulit ki la pynlong ïa ka jingkhynra kaba jur ha ka thaiñ bad kila ïohkem ïa uwei u briew ba suba donkti uba la tip kyrteng u Medius Mawlot na ka shnong Mawkaton.

Ki Pulit ki ïathuh ba u Medius ula phla ba u dei uba dung ïa u Macborn. Ka jingtohkit mynta ïa kane ka jingjia kala ïaid shakhmat ban lapdien sa ïa kiwei pat kiba donkti lang.