![](https://www.urupang.com/wp-content/uploads/2024/03/DSC00677-1.jpg)
Shillong:U Chief Information Commissioner (CIC) ka jylla u bah H Nong pluh, IPS ba la shongthait, u la ong ba bunsien ka rukom pyrkhat kaba don ha jabieng ki Public Information Officer (PIO) ki pyrshang ban buhrieh pynban ia ki jingtip ha jaka ban ai wut wut haba pan ki briew.
U bah Nongpluh ula shim bynta ha ka jingiathir halor ka RTI kaba la pynlong da ka Standing Conference of Public Enterprise (SCOPE) ha Vivanta Hotel, Shillong, ha kaba la wan iashim bynta kumba 80 ngut ki ophisar na ki tnad bapher bapher ka sorkar pdeng.
“Ka rukom pyrkhat ne ka jabieng ki PIO kumba nga la iohi, haba ki iohi pdiang ia ka jingpan jingtip RTI, ki pule bad wad shwa haei ki kyndon ban kiar na kaba ai jingtip, ha jaka ban pynbiang ia ki jingtip kumba la pan ki briew. Nga la ju ong ia ki, ka jingpyrkhat ka dei ban long kaei kaba nga lah ban ai jingtip bha ia ki pan jingtip, ym ban pyrkhat pynban kaei kaba ngam dei ban ai jingtip”, la ong u CIC ka jylla.
Haba iasam ia ka jingtip kum u kongsan, u bah Nongpluh ula ong ba kane ka ain Right to Information (RTI) Act 2005, ka dei kaba donkam bha ban wanrah ia ka jingshai bad ka jingkhuid ha ka jingtreikam ki tnad sorkar.
“Ki don ar tylli ki jingiatyngkhuh, kawei ka dei ka jingwad jingtip jong ki riew paidbah bad kawei pat ka dei ka jingpyrshang ki PIO ne ki tnad ban ym ai jingtip ia kiba pan jingtip. Dei namar kane ka daw, ba ka donkam ka jingpynshai paidbah ia kane ka ain”, la ong u bah H Nongpluh.
Haba ka ain ka wan ha u snem 2005, ki dang don shibun ki jingkulmar bad namar kane, bun ki kam kiba iadei bad ka jingpan jingtip, ki phah sha ka ophis u CIC ban bishar, hynrei mynta ki la kham duna namar ba ki PIO ki la kham sngewthuh kumno ban leh.
Wat la ka dei ka ain kaba lyngkot tang 31 tylli ki kyndon bad ka bym kyllain ban sngwthuh ruh hynrei, don ki PIO haba ki briew ki wan ban pan jingtip, ki wad shwa ia ki kyndon jong ka ain kumno ban buhrieh ban ai jingtip, ha jaka ban ai beit ia ki jingtip shaid shaid khlem buhrieh.
U la ong ba ha ka jylla Meghalaya ka jingdon kiba pan jingtip lyngba ka RTI ka long kaba tista. Ha kajuh ka por, u la ong ba ka donkam ruh ia ki kyndon ban ym buh ia ki jingma ia kiwei pat namar ba don kiba pan jingtip tang ban ioh buh jingeh ne ban thad iano iano ne ban kamai pisa.
Shwa ia kane la ioh ia ka jingkren maitphang na ki nongialam ka SCOPE kiba la iathuh ia ki jingtreikam jong kane SCOPE. Kane ka jingiathir halor ka RTI kan neh ar sngi haduh lashai.
Phi don ban ong eiei?