![](https://www.urupang.com/wp-content/uploads/2024/02/DSC00678-22.jpg)
Shillong:U myntri ka tnad pule puthi ka jylla u Rakkam A Sangma mynhynnin ka sngi, u la ong ba myn shwa ha ka por ba um pat long MLA, ki lehnoh ki wan ha iing jong u bad ki bam ja, hynrei yn leh kumno.
Haba pynrem ia ki kam lehnoh, u Rakkam u la ong ba ki kam pyntriem ki la biang katto, ha kaba la sakhi ba ki paidbah lui lui kila shah pyniap dusmon.
“Mynshwa ki lehnoh ki wan ha iing jong nga bad ki bam ja ruh, ha ka por ba ngam pat long MLA, hynrei kumno ban leh. Kane ka dei kaei kaei kaba ngi la mad ha ka jingim bad ngi la iohi ki briew jong ngi kila shah pyniap ha surok bad katto ka la biang, ngam ngeit ba kin dang kyrshan ia ki kam pyntriem”, la ong u Rakkam.
Haba kylli halor ka jingmih khubor ba ka seng Garo National Liberation Army-GNLA ka pyrshang ban khie im biang, u Rakkam u la ong ba kano kano ka jingdawa kaba shongnia, ka sorkar kan bishar la ka dei ka jingdawa ka GNLA ne ka HNLC ruh. U la ong ba um tip eiei ia ka jingmih khubor ba mih biang ka GNLA namar ba u shu iohi na ki lad pathai khubor bad um sngew lah ngeit ba kan khie biang.
U la ong ba ka jingmih kam lehnoh tang namar bym ioh kam, kam dei ka lynti ban weng ia ki jingeh hynrei dei lyngba ka lynti ka jingsuk ban pynbeit ia ki jingeh.
Katkum ka jingong u myntri, ki pulit kin leh ia kaba donkam lada dei shisha ba ka GNLA ka thmu ban pynkhie biang. “Ki pulit ki la long ba khreh, ki tip ban tehlakam. Ngam sngew lah ngeit, ngam pyrkhat ba kan long kumta, ki briew kila mad iaki kam pyntriem la jan 20 snem, ngam ngeit kin kyrshan ia ki kam pyntriem”, u la ong.
Phi don ban ong eiei?