Ka tnat ka la tip ba hiar dor u synsar, ong ka Kong Ampareen

Shillong:Ka Myntri ka kam rep ka Jylla Kong Ampareen Lyngdoh ka la ïathuh ba ka Tnat ka la tip ba ka don ka jinghiar jong ka dor u synsar hapoh ka Jylla.

Ïa kane ka la ïathuh haba jubab ïa ka jingkylli ha Ïingdorbar Thaw Aiñ, ka Myntri ka la ïathuh ba ka daw ka long ba ki Jylla ba marjan kum ka Assam, Mizoram, Tripura bad Arunachal Pradesh kila pynkiew bha ïa ka jingpynmih synsar ha la ki jong ki Jylla ha kine ki 2-3 snem.
Ka pyntip ba ka jingeh jong ka jaka rep synsar ha Meghalaya ruh ka la nang kiew. Ka jingkynshew synsar ba naduh u snem bala leit, ka dang don ha ki kudam. Ka jingkiew ka jingpynmih synsar na ki Jylla ba marjan ka la nang pynbun ïa ka mar ha Ïew, kaba la lam pat sha ka jinghiar dor u synsar”.

Halor ki sienjam ba la shim ban leh eiei halor kane ka jinghiar dor, ka Myntri kala ïathuh ba ka Mawïong Wholesale Market ka don ïa ki kudam ba ngiam ban thep palat 21,000 MT. Bun na kine ki kudam la pyndonkam ban buh ïa ki synsar ba la thad ha ka por ba hiar dor u synsar, kumta kala plie lad ïa ki nongrep ba kin ïoh kham heh ka dor”.

Ka la ong ruh da kaba bynrap, “Ka jingpoi mar manla ka sngi bad ka dor ïew jong u synsar la ju thep ha ka AGMAR KET portal bad MEGAMB portal kaba lah ban ïohi lut da ki paidbah bad nongrep ba kin tip ïa ka dor ka mur jong u synsar.”