Ujor ka JSU, ba die tiket ki khynnah

Jowai, 29 Risaw :
Ka Jaintia Students’ Union Central Body hadien ka jingujor na ki katto katne ki longkmie longkpa jong ki khynnah skul ha ri Lum Jaintia khamtam ha sor Jowai ki la kynnoh ba bun na ki skul ki juh pynbor ia ki khynnah skul ban die ia ki ticket khalai nusip bad halorkane ka bynta ka seng ka la juh sakhi ruh da ki khmat lajong ia ki
khynnah skul ha ryngkat ki riam skul, ba ki leit die ia ki ticket sha iewsha hat sha ki dukan bad sha ki ophis sorkar. Halor kane ka seng ka la ai dorkhas sha u Deputy Commissioner WestJaintia Hills District, U Superintendent of Police bad sha ka District School Education Officer West Jaintia Hills naduh ka 8tarik Nailur 2015 bad ka seng, ka dawa na ki bor ba halor ba dei ban pynsangeh noh ia kane ka jingpynkit jubor ia ki khynnah skul namar ba ka buh ia ki khynnah ha ka jingma haba leit die ia ki tiket namar ki hap ban jam ia ka surok na shiliang sha shiliang. Nangta ki khynnah ki ju mad ruh ia ki jingkren tohmet na ki briew kiba ki leit tyrwa die ia kine ki ticket. kumta na ka liang jong ka seng ka dawa na baroh ki nongpyniaid skul ba kim dei ban pynbor ia ki khynnah ha ka ban leh ia kitei ki kam, na ka bynta ban pynmih pisa ia ka skul.