Shah rahbor U BDO namar ba u thok, ong ka GNLA

Shillong, 28 Risaw:
Ka GNLA ka la kam ba ka jingrahbor ia u Block Development Officer (BDO) ka Chokpot u Jude Rangku T Sangma ha kane ka sngi Hatmajai ka dei namar ba u la thok. Ha ka jingpynlait khubor, ka GNLA lyngba u commander ka western range  u Hedio C Momin ba khot sin kum u Karak Momin, ka la ong ba ka la rahbor ia u BDO namar ba u la thok ha u Myntri rangbah ba ka pisa ba T. 40 klur ban siang rong ia ka surok ha Chokpot la shim noh da ka GNLA.
“Ngi khlem shim pisa eiei na u  BDO haduh mynta. Ngi la rahbor ia u ban wad ia ka jingshisha balei u jler ia u Myntri Rangbah”,la ong ka seng.
Ka GNLA ka la ong ba une u BDO haba u la shah thalain ha ki paidbah bym siew ia ka bai bylla shi spah sngi jong 248 tylli ki shnong ba la pyntrei ia ka Mahatma Gandhi National Rural Employment Guarantee Act (MGNREGA) kaba la kot sha ka T. 20 klur, u jubab sha ki paidbah ba ia ka pisa la shim noh ka sorkar na ka bynta ka elekshon shiteng samoi kaba la dep pynlong.
Une u BDO u dei uba pas ia ka Meghalaya Civil Service (MCS) ha u snem 2010 bad la thungkam kum u BDO ka Chokpot laar snem.
Ha kawei ka liang, ki pulit kila pynlong ia ka jingthwet kaba jur bha ha ka thain Chokpot ban pynlait im ia une u BDO ba la shah rahbor.
U BDO u la shah rah bor katba u dang wan na jaka leit ontep na Deku uba dang thmu ban leit phai sha Tura ha ka por 6:30 PM.
U BDO  u la niah hi ia ka kali namar ba u nongniah kali u shim shuti. Na ka liang ki pulit ki la dep jingtohkit na ki ar ngut kiba khlem shah rahbor kiba don lang ha katei ka por.