Shillong:U Myntri Rangbah barim ka Jylla Dr Mukul Sangma ha ka sngi Nyngkong, ula bthah ïa ka Sorkar MDA ba kan sangeh noh ïa ka jingleh politic bad ka Meghalaya Residents Safety and Security Act (MRSSA), kaba thmu ban tehlakam ïa ka jingrung kyrthep ki bar jylla bad poi wir hapoh ka Jylla.
Haba ïashimbynta ha ka jingïatai ïa ka jingkren u Lat, u Dr Mukul ula ong ba ka MRSSA ka dei kawei na ki aiñ ba biang bha kaba don ha kane ka pyrthei ban tehlakam ïa ka jingrung kyrteng ki bar jylla bad ki poi wir. La mynjur lang ïa ka da ka Ïingdorbar Thaw Aiñ ha ryngkat ka jingïadon bynta lang jong ki kynhun bapher bapher ha ki snem bala leit noh.
“Kiba bun ki ri kynthup ka USA, UK ki dang wad ïa ki lad ki lynti kumno ban tehlakam ïa ki poiwir namar ba kim don satia ïa ka aiñ kum kane,” ula ong haba bynrap, “Nga kwah ban kyntu ïa baroh kynthup ka Sorkar ba kan kheiñ kongsan ïa kane ka aiñ ba donkam, kaba la wanrah na ka bynta ka bit ka biang jong ka Jylla. To ngin ym ïaleh politic ïa kane”.
Une u Myntri Rangbah barim ula kynnoh ba ïa kane ka aiñ la set ha ka duli pjah naduh u snem 2018 namar, “Ngi rai ban ïaleh politic bad kane ka aiñ, kaba ktah ïa ka bha ka miat jong u paidbah”.
Nalor kane, une u Myntri Rangbah barim ula maham ïa ka Jylla ba ka bamsap ka dei kaba kham shyrkhei bad ktah ban ïa ki kam lehnoh, kaba lah ban ïalam sha ka lawei ka jingjot.
Haba kren halor ka jingtih dewïong beaiñ bad khaïi beaiñ, ula buh jingkylli la ka Sorkar ka nud ne em ban thung ïa ka jingtohkit ba laitluid bad ong ba ka jingleh bym hok kat kane ba jia mynta kan ym jia satia khlem ka jingtip jong ki briew kiba don ha ka bor.
Ka don ka jingong ba” U Blei Un ym pynjot ia kano kano ka jait bynriew hynrei dei ki nongialam kata ka jait bynriew hi kiba pynjot ia ka”