“Ba isih khristan” ki Assamese, kim dei ban pyni, ia ka jinglyngkot jingmut, ong ka KJCLF

Shillong:Ki nongialam jong ka Khasi Jaiñtia Christian Leaders Forum (KJCLF) ka la khot ia ki paid jong ka jaitbynriew Assamese bad ki paidbah jong ka thain ba kim dei satia ban pyni ia ki jinglyngkot jingmut bad pyrshah.

Ki dkhot jong ka Khasi Jaiñtia Christian Leaders Forum KJCLF, Shillong ka la pynpaw ba ki don ki kynhun kiba pynpaw ia ka jingisih pyrshah ia ki ritpaid ha ka thain ha kaba ki la pyndik ia ki jaka pule ba la pyniaid da ki kynhun Kristan kiba la ai jing nang jing stad sha ki samla ha ka imlang sahlang bad ha ka ri ruh.
Kumba ka paw shai, kine ki kynhun ki don ka jingisih kaba jur ia ki riewngeit kristan ha kane ka thain ha kaba ki la thmu ban thombor ia ki shlem ai jinghikai jong ki kristan kiba la ai jing myntoi sha ki samla bad ka lawei jong ki.

Kane ka kynhun ka la pynpaw ruh ia ka jingsngewkhia haba iadei bad ka jing wanrah jong ka sorkar jylla ka Assam ia ka bill bala tip kum ka Assam Healing(Prevention of Evil Practice) 2024,ban khangnoh ia ka jing ai jingkoit da kaba leh jadu ha ka kyrteng jong ka jingai jingsumar ban pynkoit da kito kiba ngeit ha kane ka jing pynkhiah.
Ka jing wanrah ia kane ka ain ka long ban pyrshah ia ka jingduwai,ka jing ngeit bad ka jingngeit ba kynja mynsiem jong ki briew ha baroh ki bynta.

Ka KJCLF ka la buh jingkyrpad ruh ia ki paid nong shong shnong jong ka jylla Assam kiba khamiar ka jingmut ba kin iakhun pyrshah ia kito kiba pynpaw ia ka jinglyngkot jingmut kiba thmu ban wanrah ia ka jingisih jaitbynriew para briew.
Ka la buh ruh ka jingkyrpad ia ki kmie ki kpa ba kin ai ka jingiada ia ki nonghikai bad ia kine ki shlem ai jinghikai kiba la saindur ia ka jingbha bad ka lawei jong ki khun ki jong ki.

Ka forum ka la kyntu ruh ia baroh ki paidbah nongshong shnong ba ki dei ban iada ia la ka jong ka jingngeit bad ki dei ban pyrshah ruh ia kito kiba kwah ban pyntroin ia ka shong suk shongsaiñ ha ka imlang sahlang.